TUNGOD sa counterflowing sa mga sakyanan paingon sa habagatang Sugbo ug nagpadayon nga pagpalapad sa karsada, nasinati ang pito ka oras nga kahuot sa dagan sa trapiko sugod alas 7 sa buntag kagahapon, Nobiyembre 1 sa lungsod sa San Fernando.
Sa silingang siyudad sa Carcar, nihinay usab ang pag-irog sa trapiko gumikan sa kadaghan sa mga sakyanan nga nagpaingon sa southern Cebu sugod alas 7:30 sa buntag hangtod alas 11 sa buntag.
Aron dili magpasagad og labang ug agi sa kadalanan ang mga tawo, gibutangan og barriers nila ni Alex Padin, traffic manager sa Carcar City Traffic Management Office, duol sa sam-ang sa Cambuntan sa Barangay Bolinawan.
Si Novem Lowe Taping, pangu sa traffic unit sa Traffic Enforcement Group sa kagamhanan sa San Fernando, nibutyag nga gikan sa boundary sa dakbayan sa Naga ug Barangay Pitalo sa maong lungsod, nihinay na ang pag-irog sa mga sakyanan subay sa upat ka lanes.
Pag-abot sa dapit duol sa menteryo sa boundary sa Barangay San Isidro diin dunay nagpadayon nga widening project sa karsada ang Department of Public Works and Highways, ang ubang mga sakyanan nga nagpaingon sa habagatan, ang ni-counterflow ug didto na nikawat og lane padung sa dakbayan sa Sugbo hinungdan nga na-trapik.
“Ang nahitabo maglisod na og agi ang mga sakyanan kay usa na lang ka lane ang magamit going to Cebu City,” sumala ni Taping dihang nahinabi sa Superbalita Cebu kagahapon.
Ang ubang mga sakyanan nga padung sa habagatan didto na paagia sa barangay road sa San Isidro subay sa one way nga karsada ug nilusot sa Barangay Poblacion South sa lungsod proper.
Human sa alas 2 sa hapon, nabalik na sa duha ka lanes ang pag-irog sa mga sakyanan padung sa habagatan ug amihanan pinaagi sa tabang sa kapulisan, Barangay Peacekeeping Action Team (BPAT), ug mga sakop sa disaster risk reduction and management office sa lungsod.