MAKAMUGNA og kalibog ug panaglalis tali sa mga pasahero ug mga drayber ang tinguha ni Transportation Secretary Arthur Tugade nga ibase sa pre-determined matrix ang pletihan sa PUJ panahon mosaka o mousos ang presyo sa mga produktong petrulyo, sumala sa usa ka opisyal sa Basak, Lapu-Lapu City Jeepney Operators and Drivers Association (Balacjoda).
Matod ni Alexander Dometita, presidente sa Balacjoda, nga kon maglibog na ang mga pasahero sa insaktong pletihan kon i-adjust sa presyo sa mga produktong petrulyo, dili malikayan nga motumaw ang lalis tali sa drayber.
Apan alang ni Eduardo Montealto Jr., regional director sa Land Transportation Franchising and Regulatory Board (LTFRB) 7, dili maglalis ang mga drayber ug mga pasahero kay ipahibawo kini daan ug pasabton ang publiko bahin niini.
Siya nipasabot nga dili awtomatik nga ipatuman ang pletihan kon mosaka ang presyo sa mga produktong petrulyo o mokunhod kay naay mga pamaagi nga ipagawas ang ilang ulohang buhatan sa pagpatuman niini.
“Mas maayo baya na nahunahunaan ingon ana pero naa pa nay mga buhaton nila (Department of Transportation) nga measures nga masegurado nga dili malibog ang mga tawo,” pagpasabot ni Montealto sa pakighinabi sa Superbalita Cebu kagahapon, Nobiyembre 1.
Dugang niya mas maayo usab ang sugyot ni Tugade kay dili na kinahanglan mag-hearing o mosang-at og petition ang transport groups kon mangayo og usbaw sa pletihan. SCG