Mga duwa karon

4:15 pm- Purefoods batok Rain or Shine

6:30 pm- Talk N’ Text batok Ginebra

BISA’G wala nahatag ang ilang yangungo, nakahukom ang Talk N’ Text Tropang Texters management nga moduwa sa main game karong gabii batok sa Brgy. Ginebra Gin Kings sa deciding Game 5 sa quarter-finals series sa Philippine Basketball Association (PBA) 2010 Philippine Cup sa Araneta Coliseum.

Human sa ilang gihimong pag-walkout niadtong Miyerkules atol sa Game 4, ang Tropang Texters ningpadayag nga dili na sila moduwa sa Game 5 ug ilaha na lang ihatag ang kahigayunan ngadto sa Gin Kings aron makaabante sa semis.

Click here for stories and updates on the Sinulog 2010 Festival.

Wala nakauyon ang Tropang Texters nga gitawagan og flagrant 2 foul ang ilang batos nga si Ranidel de Ocampo dihang nagdepensa kini kang Ronald Tubid insakto usa ka minuto ang nahabilin sa 1st quarter hinungdang ning-walkout sila.

Alang sa Tropang Texters, dili gyud angayang tawagan og flagrant 2 foul si de Ocampo niadtong higayuna.

Tungod sa pag-walkout sa Tropang Texters, hayan yanong nakuha sa Gin Kings ang kadaugan ug natabla ang series, 2-2.

Kagahapon sa hapon sa usa ka panagtigom, gisuwayan sa PBA officials sa pagpangulo ni commissioner Sonny Barrios paghangyo ang Talk N’ Text management nga moduwa karon alang sa Game 5.

Miinsister ang Talk N’ Text nga moduwa lang sila kon ilibkas ang suspensyon (pakapin sa flagrant 2 foul) ngadto kang de Ocampo.

Wala motugot ang PBA sa sugyot sa Talk N’ Text kay rason pa ni Barrios, nagsubay ra gyud sila sa patakaran ug ilaha gyung ipatuman ang suspensyon ug ang P20,000 nga multa ngadto kang De Ocampo.

Hinuon sa ngadto-ngadto, nakumbinsir ra ang Talk N’ Text nga moduwa sila karon bisa’g wala si de Ocampo.

Sa laing bahin, magsangka ang Giants ug Elasto Painters sa premirong duwa nga sugdan sa alas 4:15 sa hapon alang sa laing deciding Game 5.