ANG defending champion Team Zombabwe, kanhi Team Labadami, napabilin ang titulo human mikampeyon sa Scarevengers 2018 Zombowling nga gihimo didto sa SM Lanang Premier Bowling Center bag-ohay lang.
Si SunStar Davao sports reporter Adam Morrell mipatumba og kinatibuk-an 144 pinfalls aron ang Team Zombabwe mahimong back-to-back champion sa kompetisyon nga gisuportahan sa SM, Sky Cable, San Miguel Brewery Inc., San Miguel Pure Foods, Park inn by Radisson, Smart, Apo Agua, Aboitiz Power, Davao Light and Power Company, Lara Mia Cafe and Bistro, Dermpath, Sky, Krispy Kreme, Mari Yoga and Dance Studio, SMDC, Mi Gusta Gourmet Tuyo, Max's, Olivia and Diego, ug Swito Corp.
Gipildi niya iyang kauban si SunStar Davao reporter John Gilford Doquilla sa Team Hybrid ug SunStar Davao photojournalist Macky Lim sa Team Brains kinsang ikaduha ug ikatulo sa maong han-ay.
Mipaligid si Doquilla og 116 pins samtang si Lim miiskor og 78.
Una niini, ang Team Zombabwe, nga gilangkuban nila SunStar Davao columnist Jinngoy Salvador ug Mindanao Times columnist Ian Ray Garcia, mitapok og 320 puntos sa tulo ka duwa sa elimination round.
Ang Team Hybrid nila Doquilla, Lyka Amethyst Casamayor ug Randie Jane Comilang (294) ang ikaduha samtang Lim, Xer Jason Ocampo ug Tats Daval sa Team Brains (252) ang ikatulo.
Ang mikumpleto sa top six mao ang Team Aswang (Bing Gonzales, Joselle and Maya Padillo), Team Nakakatacute (Mark Piranha, Cristina Alivio ug Ace Perez) ug Team Angie (Ralph Llemit, Leebai Ambolodto ug Judie Vega).
Nakadawat sab si Morell og Samsung Galaxy Tab A6 gikan sa Skycable human miskor og pinakataas nga 144. (ABM)