GISUGDAN na karon sa Senado paghashas kining nag-ung-ong nga balaodnon kalabot sa giingnong “No Garage, No Car” policy nga gipangamahanan ni Senador Sherwin Gatchalian.
Katuyoan ni Gatchalian sa Senate Bill 201 nga gitawag usab og Proof-of-Parking Space Act, mao ang pagkaunhod sa problema sa dagan sa trapiko sa nasod.
Gipasabot sa senador nga panahon na nga makat-on ug masabtan sa mga Pinoy kon unsay responsibilidad niadtong mga nakapanag-iya og sakyanan.
Dugang niya nga kon mopalit og sakyanan kinahanglan nga aduna gyuy parking area aron dili kini magpataka og parking sa daplin sa dalan nga makabalda sa dagan sa trapiko ilabi na og gamay ang agianan.
Kon hingpit nga mamahimo na unyang balaod, hayan kuti na unya ang proseso sa pagpalit og sakyanan kay pahimuon pa man ka og affidavit nga magpamatuod nga aduna kay ka parkingan.
Atong gihangop ang katuyoan sa senador pero angay una ni niyang estudiyohan kay tingali baya og mahimo na lang kining dugang tinubdan sa pagpangurakot.
Nganong kinahanglan pa man ning buhaton nga anaa may local government unit (LGU) nga nga sagad niini aduna na may ordinansa nga nagdili sa pagpataka og pamarking sa ilang sakyanan.
Kining maong balaodnon nga gustong ipapasar ni Gatchalian, duplikasyon lang ni sa balaod nga nagmando sa mga hingtungdang ahensiya sa pagdakop sa mga nag-illegal park.
Ang naka deperensiya lang, kay minus ang pagpatuman ug daw sa og nagtug-tug sa pansitan ang ahensiya nga gitahasan niini.
Sa laktod nga pagkasulti, ang pagpatuman sa balaod maoy solusyon ug dili ang pagdugang niini.