Lalake gipatay sa iyang gisukmag

PATAY ang usa ka wa pa mailhing lalake nga tigbantay sa mga sakyanan nga mag-parking sa Fuente Osmeña rotunda human dunggaba sa wa mailhing tawo nga iyang gisukmag sulod sa Fuente Osmeña rotunda pasado alas 7 gabii niadtong Huwebes, Nobiyembre 1.

Ang biktima gibana-bana sa kapulisan nga naa sa 40 anyos pataas, nag sul-ob og maroon nga karsones ug puti nga senina.

Matod ni Chief Inspector Eduardo Sanchez, hepe sa Abellana police station 2 sa Cebu City Police Office, ang biktima mausab-usab ang kinaiya sigun sa mga lalake nga naa ra usab sa Fuente rotunda mangatulog.

Manghilabot usab kini sa mga tawo nga mag lingkod-lingkod sa sulod kon mosuol na ang problema sa iyang pangisip.

Nianang gabhiona nangayo, matod pa, kinig tubig sa usa ka lalake apan wa tagai hinungdan nga nasuko kini ug gisumbag ang iyang gipangayoan.

Kalit lang nalup-og ang biktima nga nagkadugo na ang lawas hinungdan nga nanawag ang usa sa mga saksi og pulis nga gidestino sa usa ka dakong tindahan atbang sa rotunda nga mao ang nanawag sa ambulansya.

Samtang kadtong duha ka wala mailhing mga lalake daling nanagan ug nangambak sa koral sa rotunda.

Sa paghiling sa mga paramedics wa nay timailhan nga buhi pa tungod kay wa na mopitik ang iyang kasing-kasing.

“Among gipangita karon katong iyang gisukmag ba. Basin kato maoy nanunggab, “ matod ni Sanchez.

Ang lawas sa biktima anaa sa St. Francis funeral parlor ug nanawagan ang kapulisan nga kon kinsa ang mga kabanay, susihon ang punerarya. AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph