SA lain niyang panginsulto sa mga Katoliko, si Presidente Rodrigo Duterte nihingan sa mga santos og “gago ug palahubog,” nga natukma sa pagsaulog sa Adlaw sa mga Santos niadtong Huwebes, Nobiyembre 1.
Si Duterte niluwat niini atol sa post-disaster command conference sa Isabela Province didto sa Luzon niadtong Huwebes sa gabii.
Apan si Cebu Archbishop Jose Palma, sa iyang bahin, niawhag sa publiko nga pasagdan ug sabton si Duterte ning lain na sab niyang pagpanaway sa Katoliko.
“Happy All Saints’ Day. Bakit naman... Sa bagay, itong tarantado talaga itong mga Katokilong p***. Bakit naman may All Souls’ Day tapos may All Saints’ Day?” matod sa Presidente.
“Hindi nga natin alam kung sino ‘yang mga santo na ‘yun. Sino ‘yung mga gago na ‘yun? Mga lasenggo. Dito na lang kayo. I’ll give you a patron. Get hold of a picture of mine. Iyan ang ilagay niyo sa altar, Santo Rodrigo,” siya nidugang.
Sila si San Agustin ug San Matt Talbot mga santos sa simbahang Katoliko nga naila nga kanhi mga palahubog sa wa pa sila mag-usab sa ilang mga kinabuhi.
Si Talbot naila nga patron sa mga alcoholic.
Ang uwahing pamahayag ni Duterte nasukwahi sa iyang giluwatang mensahe alang sa All Saints’ Day ug All Souls’ Day.
Sa mensahe nga giluwatan sa Malacañang niadtong Huwebes, si Duterte niawhag sa mga Filipino sa pagsundog sa mga santos, mag-ampo alang sa kapahulayang dayon sa mga kalag.”
“Remember our saints and our dearly departed loved ones, whose lives have deeply inspired us to grow in faith, hope, and love. We are reminded that, even in death, our bonds with them remain,” matod ni Duterte.
Sabta siya: Palma
Sabton na lang ang Presidente sa nasud, awhag ni Cebu Achbishop Jose Palma sa mga magtutuo human sa iyang gipahigayong misa sa Biyernes sa buntag, Nobiyembre 2.
“Matod pa man gani ni Sara (Duterte-Carpio), nga iyang papa (President Duterte) di man kini siya theologian, wa man ni siya mag-eskwela og catechism o theology. Mao nga kita nalang magsabot sa iyang mga gipanulti no, kay kon sa atua pa, dili man ni siya official teacher bahin sa atong pagtuo,” pasabot i Palma.
Gikataw-an kini ni Palma, kinsa niingon sa mga sakop sa media nga adunay masulti nga nindot si Duterte, adunay say yabag.
“Kini si President, no, naay mga sulti nga nindot, nga ang mga santos angay nato tahuron, angay nato ampuan. Pero usahay naay mga gisulti usahay nga daw di man gyud, sumala sa atong gituohan... Ako gani makadungog sa iyang mga gisulti, mga daw di mao, mga yabag bah, dili, akong pagtan-aw.. ahhh, kita na lang mag-understand, mag-sabot, niya kay di man siya official teacher sa pagtuo,” dugang ni Palma.
Dugang niya nga ang pamahayag sa pangulo, iya ra nga opinyon ug nga daku ang iyang pagtuo nga di basta madala niini ang mga Katoliko nga adunay hugot nga pagtuo nga anaa ang mga santos nagtabang pagpadangat sa atong mga pag-ampo sa kahitas-an.
Hinungdan nga angay lang ang pagyukbo ug pagpasalamat ngadto kanila.
Angay lang nga mogahin ang katawhan og panahon paghalad og mga pag-ampo ug pagbisita sa mga lubnganan sa mga minahal sa kinabuhi nga nitaliwan na isip paagi pagpasalamat sa ilang mga natampo kon unsa kita karon, matod sa arsobispo.
Dugang ni Palma nga bisan gani ang uban, sama sa mga Insik, hugot ang ilang tradisyon pagdumdom sa ilang mga katiguwangan.
“Ilang kinabuhi (mga santos) atong inspirasyon ug giya sa atong kinabuhi... Kinahanglan ang pagdumdom sa tanang mga kalag kay nagtuo man ta nga dili kita perfect. Posible human sa kamatayon kinahanglan pa purification, mao naa ang purgaturyo, una malangit, mao kinananglan niiining mga patay ang atong pag-ampo,” dugang sa arsobispo.