GIPANIGURO ni Mayor Oscar Moreno nga wala’y pamulitika ang programa sa gipirmahan nga memorandum of agreement (MOA) tali sa National Dairy Authority (NDA) ug sa lokal nga panggamhanan niadtong Oktubre 29.
Dunay 14 ka mga barangay sa siyudad ang makapahimulos niining maong programa sama sa Barangay Baikingon, Pagalungan, Tuburan, Tagpangi, Pigsag-an, Mambuaya, Dansolihon, Bayanga, ug Taglimao samtang sa Distrito 2 mao ang lima ka barangay nga mao ang Barangay Puerto, Macasandig, Barangay 25, 26 ug Barangay 28.
Gibutyag ni Moreno nga wala na kini masayod sa pagpili sa mga barangay nga maoy mamahimong benepisyo niining Community School Milk Feeding Program partnership sa NDA ug sa local government unit (LGU) Cagayan de Oro ug kini base sa Child Development Center (CDC) kung kini padayon nga nag-function.
“Di mi sakop ni kapitan but that does not matter di sad ingon nga katong tagaan sakop kay wala na ko kahibalo sa selection sila ana sa atong CSWD base sa child deveoplement center walay pulitika gyud ana, I assure you,” pahayag ni Moreno.
Matud usab ni nga Roy Antonio P Hojas, Officer in Charge (OIC) Department Manager sa NDA nga dako kaayo ang tabang niining programa gumikan kay ang gatas ang mga anaa sa ikaduha nga gaangkaton sa Pilipinas ngadto sa laing nasud hinungdan nga kinahanglan gayud nga ipa-ugmad ang tinubdan sa gatas.
Ang target niini nga programa mao ang mga kabataan nga nag-edad og tres anyos ngadto sa singko anyos nga mokabat sa 120 ka mga adlaw sugod sa Nobyembre karon nga tuig hangtod Marso sunod tuig 2019 diin partner niini ang usa ka global supplier nga Highland Fresh nga maoy maghatag og gatas sa mga bata.
Ang kinatibuk-an nga kantidad nga gikurambos sa NDA ug siyudad nag-alokar og dul-an P2 milyones o P1,918,800 sa siyam ka mga Barangay sa unang distrito ug lima sa ikaduhang distrito. KCS