GIRELIBUHAN ang tulo ka mga pulis sa traffic division sa dakbayan sa Talisay tungod sa kapakyas sa pag-impound sa sakyanan sa anak ni Mayor Socrates Fernandez nga si Joavan nga nakadisgrasya og magtiayon nga nagsakay og motorsiklo niadtong Biyernes sa kaadlawon sa barangay Lawaan-I.

Gitangtang gikan sa traffic sila si SP01 Elmer Saladas,P02 Roelito Tano ug si P01 Manolito Daal.

Si Supt. Henry Biñas,hepe sa kapulisan sa Talisay, nikompirmar sa Sun.Star Superbalita nga iyang gibalhin isip jailer sa sub-station sa City Hall si Tano samtang sila si Saladas ug Daal didto sa Poblacion.

Click here for stories and updates on the Sinulog 2010 Festival.

Ang maong mga pulis napakyas sa pag-impound sa puwa nga Isuzu Bighorn(YEZ-460) ni Joavan bisan og wa kini makadala sa rehistro sa sakyanan.

Sila si Tano ug Daal, gipasanginlan sa magtiayong biktima ni Joavan nga sila si Jonathan,24, ug Irene Ignacio, 26 ,taga Inayagan,City of Naga nga wa mokapkap sa suspek bisan ila kining gisultihan nga may dala kining armas.

Si Jonathan nitug-an nga

imbes tabangan sila nga nangatumba human mobabag ang sakyanan ni Joavan gitionan na hinuon siya og armas dihang nanaog ang suspek sa iyang sakyanan.

Kini samtang tulo ka mga kasong kriminal ang gipasaka sa kapulisan batok ni Joavan .

Kasong attempted homicide, reckless imprudence resulting to damage of property ug reckless imprudence resulting to physical injuries ang gisang-at sa kapulisan sa Talisay City Prosecutor’s Office niadtong Biyernes.

Si Supt. Biñas nitug-an nga isumiter nila ang dugang dokumento sa kaso unya sa Lunes.

Giklaro sab ni Biñas nga wa gyud manghilabot si Mayor Socrates Fernandez sa ilang pagtinuod sa pagpasaka og kaso batok sa anak niini.

Si Jonathan nipasabot nga tinud-on gyud niya ang kaso batok ni Joavan ug di moatras sama sa gihimo sa una niining mga biktima.

Ang asawa ni Jonathan nga si Irene niingon nga labihan niyang kuroga dihang nakakita sa armas ni Joavan nga gition ngadto sa iyang bana.