DUL-AN sa tulo na ka tuig nga call center agent si ‘Jennie’, 23 anyos, sa usa sa mga call center company sa may IT Park sa Barangay Lahug, dakbayan sa Sugbo.
Lumad siya nga taga Tagum City sa Davao del Norte ug kasamtangang nag-abang sa may Barangay Centro, dakbayan sa Mandaue.
Oras niya sa pag-duty sud na sa unom ka bulan gikan sa alas 8 sa gabii hangtod sa alas 5 sa kaadlawon.
Sukad kaniadto, nahimo na niya ug sa iyang mga higala nga pagpalabay oras ug pampaduka nga moinom una og duha ngadto sa upat ka botelyang beer, una matug.
Hinungdan nga usa si Jennie nihangop nga gipamub-an sa Mandaue City Government nga oras sa liquor ban, imbes nga gikan sa alas 12 sa tungang gabii hangtud sa alas 7 sa buntag, gihimo na kini nga gikan sa alas 12 sa tungang gabii ngadto sa alas 5 sa buntag.
Matod ni Jennie nga di na nila kinahanglan pa nga mangita og tindahan sa syudad sa Sugbo aron makainom una mouli, kay mahimo na sila makapalit sa mga 24/7 nga convenient store sa dakbayan sa Mandaue.
Giklaro ni Jennie nga wa siya ma-adik sa alcohol, apan nahimo lang kini niya ug sa ubang higala nga pampatulog ang pag-inum og beer, hinuon ilang siguruon nga himuon kini katulo o kaupat lang sa semana.
“Dili man gyud mi nga maghubog gyud, aww siguro usahay kon naa pud celebration. Pero if kanang gikan lang sa duty unya aron wa nay daghan mi hunahunaon ineg-higda, moinum mi’g beer, ilabi na stress kaayo ang pamati,” asoy ni Jennie sa Superbalita Cebu.
Ang maong pamahayag, ang nag-segunda sa gitug-an ni Mandaue City Vice Mayor Carlo Fortuna sa mga sakop sa media, nga pipila sa mga call center agents ang nihangyo nga paubsan ang oras sa liquor ban alang kanila nga kaadlawon mo-out gikan sa trabaho.
Human usab ilang nasuta gikan sa crime statistics sa Mandaue City Police Office nga kasagaran sa mga natalang kremin sama sa physical injury tungod sa kahubog, natala gikan sa alas 11 sa gabii hangtod sa alas 2 sa kaadlawon, Sabado ug Dominggo.
“Mao nga ang recommendation to prevent crimes nga ang hinungdan grabeng kahubog, that was why we have this ordinance (liquor ban), sauna 12mn to 7 to siya, pero ang mga call center lahi man ang oras, mao na ni-adjust ang atong City ordinance,” matod ni Fortuna.
Lakip sa nihangyo nga pamub-an ang oras ang mga tindahan kay apektado ilang halin.
Striktong’ gipatuman ang liquor ban ilabi na sa 24 oras nga mga convenience ug mga sari-sari store.
Hinuon tugutan nga makapalit una sa di pa ang alas 12 sa tungang gabii ug sa sud sa balay na imnun. Gani giaghat nga pabutangan og itom nga panapton ang alcoholic drinks atol sa oras sa liquor ban, hinuon daku ang pagsalig sa kagamhanan nga mosunod ang mga tindahan.
Ang maong ordinansa na-amendar sa City Ordinance No. 14-2018-1340 (An Ordinance Regulating the Sale and Consumption of Intoxicating Liquor in the City of Mandaue), niadtong Oktubre 10 ning tuiga.