Daghang sigarilyo nasakmit

KUNG itandi sa niaging tuig gamay lamang sa mga gidili sulod sa sementeryo ang nasakmit sa kapolisan sa siyudad sa Cagayan de Oro atol sa pagsaulog sa Adlaw sa mga Santos ug Kalag-kalag.

Gibutyag ni Senior Police Officer 3 Lito Baculio sa Police Station 2 sa Cogon nga gamay lang deadly weapons ang ilang nakuha nga gamiton unta sa pagpanghinlo sa mga mobisita sa mga lubong sa City Memorial Park sa Bolonsori, Barangay Camaman-an ning siyudad.

Nagtuo si Baculio nga nakamatngon na ang mga tawo sa unsay dili mahimong dad-on sa sulod hinuon daghang mga sigarilyo ang ilang nasapon.

“Peaceful ang atong sitwasyon sa peace and order so gamay ra ang atong confiscation kay minimal raman ang mga deadly weapons nga gipangdala, atong mga tawo nakamatngon na nga naa tay mga ginabawal,” pahayag ni Baculio.

Gidugang pa niini nga pinakadaghan sa ilang nakumpiska mao ang mga sigarilyo diin mga alas 1:00 sa hapon pa lamang niadtong Nobiyembre 2 anaa na sa mga 20 ka pakete ang nakumpiska.

Hugot kining ginadili lakip na mga lighter gumikan na usab kay posibleng mao kini ang hinungdan sa sunog.

“Naay mga sundang gihapon, kutsilyo, cutter, ilimnong makahubog, Tanduay ug fighter wine, ang sigarilyo ang pinakadaghan moabot na og 20 packs,” dugang niini.

Nasayran nga ihatag ra usab kini pagbalik sa dihang mogawas na ang tag-iya niini.

Samtang gibutyag ni Police Superintendent Mardy Hortillosa, tigpamaba sa Cagayan de Oro Police Office (Cocpo) nga malinawon ang siyudad ug walay natalang mga dagkong insidente atol sa kasaulogan.

“Generally peaceful ang ato pagsaulog sa kalagkalag 2018,” pahayag ni Hortillosa.

Miabot kapin kon kulang 800,000 ang mga miduaw sa nagkadaiyang mga sam-ang sa siyudad apan tungod sa hugot nga seguridad sa kapolisan natapos kini nga malinawon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph