SA LIMA ka lalawigan sa Davao region, tulo niini wala’y problema ang mga kandidatro tungod kay wala’y mi-atbang kanila sa pagka gobernador, sila si Governor Nelson Dayanghirang sa Davao Oriental, J.V. Tyron Uy sa Compostela Valley Province, ug Claude Bautista sa Davao Occidental.
Ang Davao del Sur ug Davao del Norte ang init karong panahona sa politika, tungod kay duna sila'y mga kaatbang, si Governor Douglas “Dodo” Cagas ug Governor Anthony del Rosario.
Si Governor Cagas gi-atbangan sa last term mayor Joseph Peñas, samtang sa Davao del Norte wa na magpasubli si Governor Anthony del Rosario, iyang igsuong si Rodolfo “Radney” del Rosario Jr. maoy midagan sa pagka gobernador, si Anthony mao ang mi-atbang kang Congressman Pantaleon Alvarez sa unang distrito sa Davao del Norte.
Ang team Del Rosario ug Floirendo anaa sa Hugpong Nang Pagbabago (HNP) ang regional party nga gimugna ni Davao City Mayor Sara Duterte-Carpio.
Ang nagkaproblema karon, mao si Congressman Pantaleon Alvarez, tungod kay hayan mahimong independente kung makahukom ang Commission on Elections (Comelec) Central Office sa petition nga gipadangat sa Partido Demokratikong Pilipino (PDP- LABAN) sa ilang vice president for Mindanao.
Pinasikad sa dokumento nga atong gikuptan, gikan sa Headquarters sa (PDP-Laban) pinaagi sa National Executive Resolution No. S-09-16-2018, ang maong resolution nag-authorize kang Cesar Cuntapay to execute and sign certificate of nomination and acceptance o (CONA) sa mga kandidato sa PDP Laban sa Davao Region.
Si Congressman Alvarez kaniadto Secretary General sa PDP-Laban, apan tungod kay alegasyong wala na kini mitambong sa nasudnong panagtigom sa daghang higayon, gitiwalag siya ug gipulihan sa bag-ong Secretary general nga mao si Willy Talag, diin ang Auditor mao si kanhi SAP Cristopher “Bong” Go, ug si Rogelio Garcia maoy bag-ong presidente, puli kang Aquilino “Koko” Pimentel nga kaniadto maoy presidente sa kahugpungan.
Kana ang kisaw sa politika karon sa Davao del Sur ug Davao del Norte, pero kitang mga tigpaniid unsa may partido nila, dili kini importante para kanato, ang importante kung kinsay angay sangunan sa katungdanan nga makapalambo sa atong probinsiya, siya ang dapat.
Mga lungsuranon kamo ang maghukom, inig abot na sa insaktong panahon kay kamoy nasayod kinsa kanila ang kasaligan.