PANTUKAN, Compostela Valley Province -- Patay ang minero human gitigbas sa kalalis didto sa Bagong Silang, Sityo Panganason, Barangay Kingking, alas 8:00 sa gabii, Biyernes, Nobyembre 2.
Ang biktima giila nga si Sonny Ulo, 46 anyos, ulitawo ug minero diin ang gitudlong suspek mao si Albert Aquino, 25 anyos, ulitawo, minero, parehong nagpuyo sa Barangay Kingking.
Sigun sa imbestigasyon sa Pantukan Municipal Police Station, ang biktima anaa sa impluwensya sa ilimnong makahubog kinsa nagkabikil sila sa suspek.
Giingong gisumbag sa biktima ang suspek sa nawong hinungdan nga mihulbot ang suspek sa iyang sundang ug gitigbas ang biktima sa makadaghang higayon.
Dead on arrival na ang biktima nga gidala sa ospital gumikan sa daghang mga samad sa lawas.
Human sa hitabo ang suspek paspas nga miiktad paingon sa wala matinong direksyon.