1-T ka piniriso sa CCJ gikatakdang pagawson

DUL-AN sa 1,000 ka mga piniriso sa Male Dormitory sa Cebu City Jail (CCJ) nga nag-atubang og kaso sa gidili nga drugas ang duna nay kamandoan ang ipaubos sa drug test ug drug dependency examination (DDE) aron makaapil sa kamandoan bahin sa plea bargaining agreement.

Si Jail Supt. Renante Rubio, warden sa CCJ, namahayag nga ang maong mga bilanggo dad-on sa halfway house sa Department of Health (DOH) sa Barangay Carreta, siyudad sa Sugbo alang sa pagpailawom nila sa drug test ug DDE.

Matod niya, ang doktor sa halfway house ang mo-certify sa degree sa drug offenders kon normal, mild, o severe ug kini isumitir ngadto sa korte nga mohimo og laing order base sa rekomendasyon sa doktor.

Kon normal, ipa-release ang mga bilanggo apan kinahanglan nga moadto og drug rehabilitation center nga community-based.

Apan, kon makita nila nga kini severe na, ipadala sa drug rehab center sa lungsod sa Argao nga gidumala sa DOH.

Sigon ni Rubio, lakip sa tan-awon ang mga kaagi sa bilanggo sukad nagsugod sa paggamit og gidiling drugas hangtod nga napriso.

Ang warden nipasabot nga bisan og magnegatibo sa drug test ug makapasar sa DDE sa halfway house, mag-agad sa rekomendasyon sa doctor ug sa kamandoan sa korte alang sa pagpaubos sa mga bilanggo sa plea bargaining agreement.

Sumala ni Rubio, kon maaprobahan sa mga korte ang pagpagawas sa maong gidaghanon sa binilanggo, dako og ikatabang nga maluagluagan ang ilang pasilidad.

Siya nitug-an sa kasamtangan, moabot ngadto sa 5,403 ang populasyon sa mga bilanggo sa CCJ nga paigo lang unta sa 1,800 ang kapasidad.

Si Rubio nasubo nga hinay ang pag-irog sa gidaghanon sa mga priso nga ipaubos sa pag-atiman sa halfway house diin 10 ngadto sa 20 ka slots lang matag buwan ang gitagana alang sa CCJ.

Tungod niini, nihangyo si Rubio sa bag-ong executive judge sa Cebu City Regional Trial Court nga si Judge Macaundas Hadjirasul ug sa DOH nga bansayon ang ilang unom ka mga nars aron sila na maoy mopahigayon sa DDE ug drug testing nga gimando sa mga korte alang sa mga bilanggo nga makapahimus sa plea bargaining agreement.

Sa bag-ong plea-bargaining framework sa Korte Suprema, kadto lang moangkon nga sad-an ug nag-atubang og mga kaso bahin sa illegal drugs nga ang silot dili tibuok kinabuhi nga pagkapriso o kamatayon, ang makaapil niini.

Kadtong masakpan naghupot og ubos sa lima ka gramos nga shabu, marijuana, opium ug ubang gidili nga drugas.

Gikasohan og kalapasan sa Section 11 sa Republic Act 9165 ug may penalty nga 12 ka tuig ug usa ka adlaw hangtod sa 20 ka tuig nga pagkapriso ug dunay multa nga mo-range gikan sa P300,000 hangtod sa P400,000, mahimong maka-plea bargain ngadto sa kalapasan sa Section 12 nga possession sa ekipo, instrument, apparatus ug uban pa nga dunay penalty nga unom ka buwan ug usa ka adlaw ngadto sa upat ka tuig nga pagkapriso ug multa nga gikan sa P10 mil ngadto sa P50 mil. (SCG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph