MOABOT ngadto sa 241 ka mga benipisaryo sa 296.6230 ka ektartya sa luna ang nakadawat og titulo gikan sa probinsya sa Misamis Oriental.
Human niadtong Miyerkules sa gabii nahidangat sa dakbayan sa Cagayan de Oro si Presidente Rodrigo Duterte aron pagtunol sa Certificates of Land Ownership Award ngadto sa 3,400 agrarian reform beneficiaries gikan sa lima ka probinsya sa Northern Mindanao.
Anaa sab sa kalihokan si Misamis Oriental Governor Yevgeny Vincente Emano ug dihang gihinabi sa sakop sa prensa iyang gibutyag nga unta kining luna nga gihatag sa gobyerno dili nila ibaligya ug unta himoung umahan alang sa agrikultura ug puslan sa insakto nga paagi sa pagtanom.
Kini dili parentahan ug ibaligya ug gamiton sa insakto.
Apan si Department of Agrarian Reform (DAR) Secretary John Castriciones niingon nga dili mahitabo nga mabaligya ang luna tungod kay padayon kining gamiton sa DAR sulod sa napulo ka tuig ug kon mapamatud-an nga gibaligya kini bawion kini sa gobyerno ug ihatag sa laing benipisaryo.
Dinhi sa probinsya sa Misamis Oriental sagad sa makadawat nagikan sa siyudad sa Gingoog diin gihatagan ang mga kanhi sakop sa New People’s Army nga nag-organisa sa ilang kaugalingon nga mga sakop sa Tagpako Farmers’ Cooperative. (SVB)