MIBAHAD si Presidente Rodrigo Duterte nga pamatyon ang bisan kinsa nga mangilog og yuta nga aduna na’y tag-iya dinhi sa nasod.
Niadtong Miyerkules sa gabii, Oktubre 31 nahidangat sa Cagayan de Oro City si Duterte ug nangunay pagtunol sa Certificates of Land Ownership Award (CLOAs) ngadto sa kanhi mga rebelde ug Moro fighters.
Mokabat sa 5,808 ektarya sa luna ang gitunol ngadto sa 3,400 ka mga agrarian reform beneficiaries (ARBs) sa Northern Mindanao nga giduyogan ni Department of Agrarian Reform Secretary John Castriciones.
Sa maong kadak-on sa yuta, moabot ngadto sa 3,856.8945 ektarya ang nahatag sa Lanao del Norte; Bukidnon nga adunay 1,218 ka benepisaryo nga modawat sa 1,527.4515 ektarya, Misamis Oriental adunay 241 beneficiaries, 296.6230 ektarya, ug Misamis Occidental nga adunay 134 beneficiaries sa 127.1022 ektarya.
Matud ni Duterte nga daghan pa nga yuta ang ihatag sa katawhan nga gipanag-iyahan sa gobyerno apan maghulat lamang sa insaktong panahon tungod kay dili ingon ana kadali kini nga mahatag.
Gikapungot sab niini ang mga New People’s Army (NPA) o mga komunista nga gapangilog og yuta bisan duna nay tag-iya.
Kadamay
“Nigara maning komunista karon. Basta makakita sila og bakanteng yuta okupasyon. Taga-i ko og panahon. Pero mo-warning ko ninyo do not confiscate or seize or occupy sa yuta nga nay tag-iya ayaw ninyo buhata nga nanay tag iya inyo ilogon,” matud ni Duterte.
“Pareha sa kadamay, magbuka mig inutil nga gikahatag kana sa mga pobre ug mga sundalo inyong ilogon. Mawad-an ko og nawong nga Presidente nga inutil nga dili nako kaya iplastar. Paghulat lang mo diha sa Bacolod. Ayaw mo pangilog unya patyon ninyo ang mga tao,” dugang niini.
“Basta mangilog mo og yuta you will be evicted. Kuhaon mo, alsahon ug mosukol mo mabun-og gyud mo. Basta mosukol nga armado patya ako’y gasugo ayaw ninyo buhata dili ko magduha duha sige pangilog mo. Holdaper ang mga ya**, mohatag ko og yuta unsaon koman na, kana sa gobyerno ihatag na kana. Ayaw mo pangilog ug panghadlok. Akong order sa polis bitbita mosukol pugsa dalha sa istasyon, kung naay sugdang ug manigbas, patya,” mando ni Duterte.
Gimando sab ni Duterte nga ngadto kang Agrarian Reform Secretary John Castriciones nga iprayoridad ang pagpang-apod og yuta ubos sa Comprehensive Agrarian Reform Program sa Negros islands, Bacolod ug uban parte sa nasod.