HUMAN sa iyang kusganong panghimakak kabahin sa kalambigitan sa pipila ka mga sakop sa kapulisan sa mga kaso sa pagpamatay dinhi sa rehiyon sa miaging mga buwan, karon miangkon naman hinuon si Sr. Superintendent Debold Sinas nga adunay mga pulis nga nahilambigit niini. Matod niya nga ang maong mga pulis atoa magserbisyo sa mga sindikato sa illegal nga drugas isip hitmen. Unsa?
Kakuyaw god ani. Sa ato pa diay, “double agent” ning atong pipila ka mga pulis. Matod ni Sinas nga nakakuha siya og mga impormasyon nga adunay mga retirado ug aktibo nga mga pulis nga atoa magserbisyo sa mga sindikato. Iyang gi-esplikar ang organizational set-up sa usa ka sindikato. Adunay drug lord, pushers, mga kolektor ug mga hitmen nga andam mopatay niadtong dili mo-remit sa halin sa drugas.
Ug kasagaran nga kuhaon sa mga druglords nga hitmen kadtong mga retirado ug aktibong pulis nga haniti na sa paggamit og armas ug pagpatay. Sa ato pa, aduna gyuy kalambigitan ang pipila ka mga sakop sa kapulisan sa mga patay. Modawat na diay og kontrata ang atong kapulisan.
Mokompiyansa pa ta sa atong kapulisan ani nga wala man kitay kasayuran kon kinsa ang naa sa side o habig sa gobiyerno? Kon mao kining kalakiha, mangutana ko ni Sinas. Kinsa man ang nagpapatay nila Ronda Mayor Nonie Blanco, Ronda Vice Mayor Jonah John Ungab, sa amahan ug anak nga Bas ug sa uban nga may kalambigitan sa illegal nga drugas?
Sa kaso nila in Tejero barangay councilor Jessielou “Jingjing” Cadungog ug ni PDEA agent Von Tecson nga diin ang mga pulis maoy gidudahan nga nagpaluyo. Si PO1 Eugene Calumba mao unta ang mopatay ni Cadungog apan naunhan sa iyang driver/bodyguard nga si William Macaslang. Si kinsa man kadto si Calumba? Ahente sa gobiyerno o atoa magtrabaho sa sindikato? Si PO3 Roderick Balili nga maoy gitumbok nga usa sa mga mi-ambush patay ni Tecson. Asa man to siya nga habig? Sa gobiyerno o sa sindikato? Ipa-klaro ning Sinas ang mga papel sa iyang nga pulis. Ilhon og si kinsa kanang mga scalawags diha aron tangtangon sa serbisyo. (bobbygnalzaro@gmail.com)