TULO ka mga linog ang ningtay-og sa managlahing dapit sa Visayas kagahapon, Nobiyembre 5.
Nasinate sa Cebu City ang intensity 2 apan, wa kaayo mamatikdi tungod sa iyang kahinay.
Ang hepe sa Philippine Institute of Volcanology and Seismology (Philvolcs), Robinson Jorgio, nibutyag nga unang pagtay-og nahitabo kagahapon sa 7:45 sa buntag diin nagdungan sa paglihok ang epicentre didto sa Sibunag, Guimaras sa 4.0 magnitude samtang 4.7 magnitude sa San Jose, Antique.
Ang duha ka lalawigan adunay gilay-on sa usag usa nga 85 kilometers .Gisundan sa laing linog sa 10:54 sa buntag diin ang epicenter nahimutang sa Guimbal, Iloilo nga mitala sa 4.8 magnitude ug mirehistro sab og intensity two sa dakbayan sa Sugbo base sa intensity meter sa Philvolcs.
Matod pa ni Jorgio nga ubay ubay sa mga aftershock ang ilang na-record human sa maong pagtay-og apan pulos hinay.
“Tectonic origin ni siya (linog),” pasabot ni Jorgio.
Na-atol usab nga kagahapon maoy nationwide simultaneous earthquake drill nga kabahin sa “Observance of World Tsunami Awareness Day.”
Ang Lapu-Lapu City Disaster Risk Reduction Management Office nga gipangulohan ni Andy Berame ang mipahigayon og earthquake drill sa isla sa Olango aron sa pagpabansay-bansay sa mga residente sa isla sa mga angayang buhaton sa higayon nga motumaw ang maong katalagman.
Naabtan sab sa Superbalita Cebu ang mga kawani sa Pagasa Mactan nga gipangulohan ni Al Quiblat nga mipahigayon sab sa maong drill diha sa ilang buhatan. FVQ