TUNGOD sa kakulian sa pag-re-extend sa kontrata sa mga conduit bank, nalangay og hatag ngadto sa mga pamilya nga mga benepisyaryo sa Pantawid Pamilyang Pilipino Program (4Ps) sa Department of Social Welfare and Development (DSWD) sa Central Visayas ang ayuda sud sa upat ka buwan gikan sa Hunyo hangtod sa Septiyembre ning tuiga.
Apan dali giklaro ni Kerwin Macopia, information officer sa 4Ps sa DSWD 7, nga ang mga benepisyaryo lang nga over-the-counter sa pagdawat og cash grants ang nakasinati sa maong problema sanglit ang mga pamilya nga nagdawatan pinaagi sa cash cards sa Land Bank of the Philippines (LBP) padayon nga nakadawat og subsidy gikan sa kagamhanan.
Ang mga benepisyaryo nga over-the-counter nga modawat og cash grants mao kadtong nanimuyo sa kalungsuran ug kaislahan nga lagyo og mga sanga sa LBP.
“Na-delay ta because nagpa-re-extend ta og contract sa atong mga conduit bank. Kay remember ang ilang cash grant wala baya sa DSWD, naa sa Land Bank ug ang Land Bank mangita pud og conduit bank,” pagpasabot ni Macopia dihang nahinabi sa Superbalita Cebu kagahapon.
Siya nidugang nga kinahanglan i-bid ang pagpili og conduit nga mga banko nga maoy moadto sa matag lungsod o bisan sa isla aron ihatag ang cash grant sa matag pamilya nga mga benepisyaryo sa 4Ps.
“I-bidding sad na, unya naka-stipulate nana sa kontrata ang period to pay, dili man na siya forever. So, mao to nag-re-extend ta,” dugang pagpasabot ni Macopia diin molungtad og usa ka tuig ang matag kontrata nga sudlan sa conduit partner.
Paninguhaon nila nga karong Nobiyembre 16 masugdan ang pagpanghatag sa cash grants sud sa nahisgutang upat ka buwan ngadto sa mga benepisyaryo samtang ang alang sa Oktubre ug Nobiyembre posible sa Disyembre masugdan ang distribusyon.
Dinhi sa rehiyon 7, moabot sa 287,266 ang partner-beneficiaries sa 4Ps ug 189,259 ang makadawat pinaagi sa over-the-counter sa conduit bank samtang 98,007 ang magdawatan pinaagi sa cash cards nga diretso ma-withdraw sa automated teller machines (ATMs) sa LBP.
Sa maong ihap, 151,280 ang naa sa Sugbo diin 34,946 ka mga pamilya nga mga benepisyaryo ang magdawatan pinaagi sa cash cards ug 116,334 ang ipaagi sa payout o over-the-counter.
Gidugang ni Macopia ang National Confederation of Cooperatives (NATCCO) ug Rural Bank of Catmon ang conduit partners sa LBP sa conditional cash transfer sa mga benepisyaryo sa 4Ps dinhi sa Sugbo.
Iyang giklaro nga way kurapsyon nga nahitabo sa kalangay sa distribusyon.
“Ato lang iklaro nga walay kurapsyon ani. Remember ang kwarta kay Land Bank to partner beneficiaries, wala nay laing agian. Dili na moagi sa amoa, dili na moagi sa munisipyo, direcho jud na sa ilaha. Kaya lang duna tay naagian nga kakulian karon,” dugang ni Macopia.