President's Cup karong Disyembre

ANG Escandor Group of Companies kauban ang Samahang Basketbol ng Pilipinas (SBP) Davao ug ang Philippine Collegiate Champions League (PCCL) mag-host sa unang higayon nga President's Cup collegiate basketball tournament karong Disyembre.

Sa interbyu kang SBP Davao executive program director Ronel Leuterio, ang maong torneyo usa ka inisyatibo ni Escandor Group of Companies president ug SBP Davao regional director Glenn Escandor aron pasidunggan ang Presidente sa nasud Rodrigo Duterte.

Ang President's Cup dunay tulo ka liga, ang PCCL Mindanao Finals sa Disyembre 1-3, PCCL Zonal Championships sa Disyembre 4-5, ug ang Philippine Regional Championships sa Disyembre 6-8.

Ang kampeyon sa men's collegiate division sa nagapadayong Gaisano Grand Cup 2018 ang mopresenta sa Davao Region batok sa tim gikan Cagayan de Oro City, Zamboanga City ug ang defending champion nga General Santos City sa Mindanao Finals nga posibleng himoun sa Davao City Recreation Center o Rizal Memorial Colleges (RMC) Event Center.

Samtang ang modaug sa Mindanao Finals ang mobitbit sa Mindanao sa Zonal Championships kontra Visayas Finals champion ug ang mihari sa Cebu Schools Athletic Foundation Inc. (Cesafi) nga ipahigayon sa Arcadia Active Lifestyle Center.

Ang modaug sa Zonal Championships ang makig-atbang sa National Capital Region (NCR)-Luzon sa best-of-three Philippine Regional Championships nga himoun gihapon sa Arcadia Active Lifestyle Center.

Si Joe Lipa, founder sa PCCL ug ang President's Cup head organizing committee, mipadala og mensahe kang Leuterio, nga ang modaug sa Philippine Regional Championships moduwa kontra sa tim gikan University Athletic Association of the Philippines o National Collegiate Athletic Association diin duna sab kaugalingong elimination round.

Ang panagharong himuon sa Manila sa Enero 2019. (ABM)