USA sa pinakalisod nga propesyon nga sudlan mao ang pagka-abogado. Lisod sab masabtan sa tawo ang papel sa abogado busa talagsa ra kaayo mosulti ang bata kung pangutan-on kung unsay buot nilang mahitabo inig kadako.
Kasagarang isulti sa bata kay mahimong doktor, dentista, pulis, maestra o maestro, bombero, piloto, sundalo, pari ug uban pa apan wala gyoy moingon nga mag-abogado sila.
Para kanako makadesisyon lang ang bata nga mokuha og kursong abogasya kung makita na niini ang trabaho sa usa ka abogado o kaha ma-impluwensiyahan siya sa iyang ginikanan o higala nga abogado sab.
May duha ako ka higala nga nahimong abogado ug gani nahimo pang huwes ang usa human sila napriso sa kasong rebelyon sa panahon ni Marcos.
Pagkaguwa sa prisohan nidiretso gidayon sila sa eskwelahan aron mokuha ug kursong abogasya. Nahimo pang direktor sa National Police Commission ang usa nga naghawid sa mga kaso sa kapulisan.
Naa puy tigulang nga kapila na nabagsak sa bar exam ug sa katapusan niyang pagkuha dali ra siyang nahuman. Iyang gisulatan ang iyang test paper ug “Dear Sirs, I am 80 years old, have mercy I want to die a lawyer!”
Matud pa niya nga kabado siya moadto sa husgado kay basin mapusilan niya ang huwes kung mapildi ang iyang kaso. Wala puy kwarta ang abogado nga nagboluntaryo nga manalipod sa katungod sa kabus.
Maayo na lang kung mahatagan sila’g manok ug gulay sa ilang pro-bono nga serbisyo sa katawhan. Karong Nobyembre 4, 11, 18 ug 25 moapil sa bar exam ang hapit 9,000 ka mga estudyante sa abogasya didto sa kaulohan.
Sumala sa Korte Suprema nga maoy nagdulama sa bar exams, mao kini ang pinakadaghan nga moapil sa pasulit sa mga nanglabay’ng katuigan. Niadtong 2016 aduna ray 6,831 samtang 6,748 sab sa 2017. Uso pa diay ang pag-abogado apan maayo na lang kung may 30 porsyento kanila nga mahimong abogado.
Hinaut nga daghang abogado nga makapasar ug mo-top pa dinhi sa Davao pareha sa nangaging katuigan ubos sa akong higala nga si Dean Manuel Quibod sa Ateneo Law School.
Apan gawas sa “private practice” o ang pribadong pagdawat ug kaso, ang pagka-abogado maoy sagad hagdanan sa politika ilabi sa pamilyang anaa na sa politika. Kung di ko masayop, sobra 50 porsyento sa mga sakop sa kongreso mga abogado o naka-eskwela og abogasya.
Busa bisan unsa man ang katuyoan, good luck sa tanang mga attorney-to-be nga taga Davao.