SUPERBALITA CAGAYAN DE ORO

Todino: Santo Duterte

Pro Bono

NIADTONG “Todos Los Santos” wa makapugong si Presidente Duterte gitirahan na usab niya ang simbahang Katoliko pinaagi sa iyang pagkuwestiyon sa tinuohan niini.

Nangutana ang presidente kon nganong ludhan ug ampohan kining mga santos nga wa man gani makaila ang katawhan niini.

Nisugyot siya nga iplastar nalang iyang hulagway sa altar ug mao kini ang simbahon kay sa niadtong mga “palahubog” nga mga santos.

Alang niadtong mga deboto nga Katoliko seguradong mapikon sila, komedya man o dili ang tumong sa presidente.

Apan, alang niadtong buot makisayod sa kamatuoran tingali gusto pa nila nga masayran ang tiunay nga mensahi ni Duterte.

Kon ang tawo dunay ikasaway sa usa ka tinuohan o kalihukan, malagmit dunay daghang motibo nga nagpaluyo niana.

Posible wa siya makagusto ug duna siya’y nahibaw-an nga sukwahi sa gituohan sa kadaghanan.

Sa sitwasiyon ni Duterte, nakasiguro ta nga duna siya’y katarungan pagsaway sa usa ka tinuohan nga gipaagi lamang niya sa komedya.

Unsa ba’y nahibaw-an ni Duterte nganong naka-ingon man siya nga dili angay halaran og pag-ampo kining mga santos.

Tuod no, kinahanglan baya ta makisayod kon angay ba gyud ta moampo sa mga santos ug moampo alang sa atong mahal sa kinabuhi nga mitaliwan na.

Nasayod ta ang kinabag-ang populasyon sa nasod mga sakop sa Romana Katoliko diin nagtudlo nga ang kalag sa tawo inig kamatay niini modiretso sa langit, purgatory o sa imperno.

Kining maong pagtulon-an nasubay ba kini sa Pulong sa Dios, makita ba nato diha sa Balaang Kasulatan.

Bisan dili nato ibasi sa Bibliya, komon sentido lang. Kon atong ugkaton ang lubnganan naa gihapon diha ang bukog sa tawo. Nagpasabot nagpabilin sa yuta ang mga patay.

Kon tua man sa purgatory,nan, kadtong mga adonahan lang maoy malangit kay maka-afford man sila sa pagpamisa, bisan kada adlaw. Kwartaha’y ba diay ning kaluwasan sa tawo?

Dili ba nagtuo man ta nga mobalik si Hesu-Kristo aron sa paghukom sa mga patay ug buhi? Kung tinuod pa nga inig kamatay sa tawo modiretso na sa langit, nan, unsa pa may tuyo ni Hesu-Kristo nga mobalik pa sa kalibutan?

Duha lang ka bersikulo sa Bibliya akong ibilin dinhi – ang Eclesiastes 9:5,6 ngadto 10 ug ang Pslam 115:17. Tataw diha ang mensahi nga wa na gyoy kalibutan ang tawo kon mamatay, dili na makadungog, labaw nga dili na mobalik, kay magpabilin siya sa lubnganan.

Busa, kining mga pag-ataki ni Duterte pagkwesiyon sa mga tinuohan sa simbahan mas maayong isipon nato nga hagit. Utingkayon nato kon duna bay kamatuoran o wala. Basin baya magiyahan ta ngadto sa kamatuoran. Ug dihang atong masayran ang kamatuoran, dili ka ta maka-ingon nga santo gyud ni si Duterte!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph