HELLO, kagahapon! Tingog nga nangumosta nako sa paghitangka ko sa pultahan sa IPI, Sports Complex, Mandaue City dihang nitambong ko uban sa akong asawa sa Class ’78 Reunion sa Mandaue Academy karon UV Branch.
Di ko makatuo kay talagsaon ang ilang gihimo. Just imagine, 48 years na ang nakalabay apan sila naka-reunion pa gayud. Nagpasabot sa ilang gugma sa usag usa. Panagsandurot ug panaghigalaay.
Sa kinabuhi bililhon ang “good human relations.”Kini ang ilang gipakita ang way pagkausab sa ilang relasyon sa upat ka tuig nilang panagkauban kanhi sa klase --- gilaw sa ilang kamatinud-anon.
Lapyo ug batan-on pa kaayo sila dihang nagtudlo ko nila sa subject nga Economics sa 3rd year. They were filled yet with much innocence, but ready to learn about the nitty-gritty of life.
Nagtudlo sad ko nila sa English literature diin sila mga responsive kaayo. Gisilsil ko nila nga ang kinabuhi usa ka balak nga mahimong patahumon ug palambuon. Ilang kining gisunod.
Malampuson sila sa kinabuhi, sa karera ug sa pagka ginikanan. Ang uban gikan pa sa Amerika nga ning-anhi pagtuyo aron makigduyog sa ilang mga kauban bisan sa daklit lamang.
Ang panahon makausab tuod sa atong panagway, apan wa mausab ang ilang mga pahiyom nga kanunayng buhi. Ang ilang maayong batasan ug kinaiya nga hulma nga Mandauehanhon.
Nanambong ang kanhi kauban kong mga magtutudlo nga sila Maam Irene Signe. Maam Lucia Lizarde, Jezebel Macasero ug Remy Cadlom. Dunay wa makatambong. Napulo na namo tawon namahuway (PSK) na.
Ang among bright nga Physics teacher nga si Maam Signe gamay rang nausab sa pamayhon. Si Mrs. Lizarde, basketball coach, abtik pa gihapon sa edad nga 84. Sila Jessie ug Remy (cancer stricken karon ) okey pa sad gihapon
Nindot ang ilang mga token sa teachers. Yes, malampuson nga reunion. Kudos nilang Ellen Cabatingan, Mariza Uy Regis, Imelda Ardines Casurra, Elizabeth Rosal, Antonio Oljol, Luchi Iway, ug Noralene Quindao.