SUSAMA na unya sa airport nga mamonitor mismo sa pasahero ug sa pamilya niini ang mga biyahe sa barko sa Central Visayas subay niining plano karon sa Philippine Coast Guard (PCG) Central Visayas nga Oplan I-Care.
Atol sa ika-51 nga kasumaran sa PCG 7, ilusad nila ang Oplan I-Care diin usa sa feature niini nga mamahimo nang makakita ang publiko sa oras nga nibiya ug niabot ang usa ka barko sa biyahe niini.
Karong adlawa, hingpit nga ilusad kini sa PCG 7 diin mao kini ang gipanghigusgan sa Community Assistance Response Enforcement alang sa komunidad, seafarers ug maritime.
Gawas sa nag-unang tumong sa PCG 7 nga luwas nga pagbiyahe sa kadagatan, mamahimo usab kini nga dangpanan sa publiko o pasahero sa panahon nga anaa sila’y reklamo kabahin sa ilang pagsakay.
“This oplan is one of the major endeavor by your coast guard to address such and have a safe, secure and clean Maritime Environment,” matod sa tigpamaba sa PCG 7 nga si LTJG Michael John Encina.
Paghulagway ni Encina nga usa ni sa pamaagi sa PCG 7 nga mas molapad pa ang ilahang information campaign alang sa publiko. HBL