ADLAW’NG Lunes, Nobyembre 5, ubay-ubay nga kalihokan ang gihimo ni Danna Rose Socauco kinsa mananaog isip 1st runner-up sa Miss Millennial 2018 sa Eat Bulaga.
Atol sa pagpakayab sa nasudnong bandila sa Kapitolyo Probinsyal, mismong si Governor Yevgeny Vincente Emano kauban ang Tourism Department head Atty. Jeffrey Saclot maoy nihatag niini og plaque of recognition tungod sa pagdala og garbo ug pagpromot niini sa probinsya sa Misamis Oriental nga nalantawan ug nakita sa tibuok nasod sa Pilipinas.
Human sa mainiton nga pagdawat sa taga kapitolyo kaniya nagpahigayon kini og motorkada sa palibot sa siyudad sa Cagayan de Oro ug gihigayonan og press conference kauban ni Emano.
Gipa ambit ni Socauco kung unsa siya ka hikab ug kalipay sa dakong suporta nga gipakita sa taga Misamis Oriental.
Daw ang suporta sa katawhan maoy nagdala kaniya ngadto sa kadaogan ug gipasalig niini nga bisan makita na siya kanunay sa Eat Bulaga magpadayon iyang promosyon sa probinsya aron kini mas maila pa sa tibuok kalibutan.
“The other day nag shoot mi about sa province, wala ko nag-expect nga abi nako nga humana ang pag promote. Hayahay kaayo ko nga usa sa nakadaog kay ma continue nako og promote atong Tourism,” matud ni Socauco.
Gihatagan sab niini og eksplenasyon ang iyang tubag sa question and answer portion atol sa kompetisyon nga kung makadaog kini og premyo sa lotto apan dili kwarta ang gusto niining madag-an mao ang maila ang Misamis Oriental.
“Nakita nako kung unsa kadako ang support ni Governor Bambi sa akoa ug ani nga kompetisyon, naa gyod siya milantaw sa kompetisyon mao nga wala koy lain gihuna huna kon dili ma promote ang atong probinsya pinaagi adto nako nga tubag,” dugang ni Socauco.
Gikalipay sab niya kini nga kompetisyon tungod kay sukwahi kaayo sa iyang mga naapilan. Daw mipokos pag-ayo sa promosyon sa lalawigan ug kinahanglan millennial ang dating sa usa ka kandidata.
Sa iyang bahin ni Emano, iyang gipasalamatan ang maong telibisyon nga adunay susama niini nga kompetisyon. Nahatagan og kahigayon ang mga probinsya nga maila sa nasod. Gipasalamatan sab niini si Socauco nga gihimo ang tanan maila ang probinsya.
Gipasalig niini nga mas dugang suporta pa iyang ihatag kung aduna man kompetisyon nga susama niini sa sunod nga tuig.
Human sa press conference, misuroy sab dayon si Danna sa weste nga bahin sa Misamis Oriental ug gisuyod ang tanan nga tunghaan ug gibisita pagpasalamat sa ilang mga text votes, Facebook likes ug shares ug uban pa.
Adlawng Miyerkules, Nobyembre 7, mibisita sab kini sa usa ka programa sa radyo ug ang este nga bahin sa lalawigan na usab ang gisuroy niini sa dili pa kini mobalik sa kaulohan.
Taliwala sab sa kabisi ni Socauco, gibutyag niini nga adunay “special someone” karon nga naghatag ug dugang kadasig ug kolor sa iyang kinabuhi.
“Yes, naa koy someone special. Inspired ko karon mao guro nga na 1st runner-up ko. Happy ko kung unsay naa sa amoa karon and then dili lang pod ko gusto nga ma public kaayo mi,” pahayag ni Socauco. (SVB)