SIKOP ang usa ka empliyado sa Land Transportation Office (LTO) atol sa gipahigayong drug bust niadtong Nobyembre 7, sa Inabanga St. Zone 1, Bulua, dakbayan sa Cagayan de Oro.
Naila ang suspetsado na si Michael Rey Laureta, Transportation Regulation Officer II sa LTO kinsa giingong Anti-Smoke belching unit head.
Sa nahipos nga impormasiyon, giingong nagpahigayon ang Philippine Drug Enforcement Agency (PDEA) og operasyon hinungdan nasikop ang suspetsado.
Giingong taodtaod na si Laureta gipanid-an sa PDEA, hinungdan na sab kini nasikop human napalitan og usa ka-pakete sa gituohan nga shabu sa kantidad nga usa ka-libo ug laing duha ka pakete nga nakuha gikan niini, lakip na usab mga drug paraphernalia.
Samtang gibutyag sa kadagkoan sa LTO nga nasayod na sila nga gipaubos na sa surveillance ang maong suspek hinungdan nga niabot ang panahon nga nasikop kini.
Ang suspek ang nagtingkagol na sa buhatan sa PDEA. (KCS)