GIBALIKAN na sa iyahang pamilya ang bag-ong anak nga bata nga gibiyaan sa Northern Mindanao Medical Center (NMMC), dakbayan sa Cagayan de Oro.
Matud sa usa ka social worker, sa NMMC, nga human namatay ang inahan niini sa cardiac arrest, nakabisita pa ang paryente ug amahan mismo sa bata ug gipasabot sa mga doctor ang sitwasyon sa bata nga aduna kini down syndrome.
Duha ka-adlaw human wala gibalikan ang bata, napugos ang ospital nga magpahibalo sa publiko pinaagi sa SunStar SuperBalita aron makit-an kini sa iyahang pamilya.
Dihang na-post kini sa Facebook page sa maong mantalaan, miabot ngadto sa 1.5K ang shares niini ug gipang-tag ang mga kaparyentihan sa maong bata.
Sa pagkakaron, nihangyo og dakong pagsabot ang pamilya niini nga itugyan na lamang kanila ang responsibilidad tungod kay ilang gipasalig nga dili gyod kini pasagdan.