USA ka tawo nga nagsakay sa iyang bisekleta kalit nga gidaro sa gikasugat nga Holiday Bus human nitipas kini sa linya sa dalan nga giagian sa biktima.

Ang kapulisan sa lungsod sa Padada, Davao del Sur nagkanayon nga nahitabo ang aksidente didto sa national highway sa ilang lugar atubangan mismo sa Padada Valley Memorial Park, sakop sa Barangay Northern Paligue sa lugar.

Subay sa taho, mga alas 9 sa gabii, Pebrero 6, ang biktima nga si Genaro Udal, 49 anyos, laborer ug taga Magsaysay, NCO District sa lugar, nadasmagan sa bus nga nagbaton sa plakang LWS-511, body number 8851 nga gimaneho ni Rolando Villarin, 33, minyo ug molupyo sa Barangay San Pedro, lungsod sa Kiblawan, Davao del Sur.

Sa imbestigasyon, nasuta nga nitipas sa pikas tampi sa dalan ang bus nga gihulagway nga ni-overtake sa usa ka motorsiklo apan daw wa kini makabantay nga katagbo niini si Udal nga nagsakay sa iyang bisekleta.

Tungod sa kakusog sa impak sa pagkabangga, ang biktima nilagpot gikan sa iyang gimanehong bisekleta, taho ni PO2 Danny Mualong, imbistigador sa kaso.

Sumala pa nga natabang pa ang biktima ug gidala sa Davao del Sur Provincial Hospital apan wa mitaho ang kapulisan kun unsa na ang uwahing kahimtang sa biktima.

Ang drayber sa maong bus niampo dayon ngadto sa mga otoridad aron atubangon ang sala nga nahimo. (Dondon Dinoy)