TUNGOD sa sunodsunod nga rollback sa presyo sa mga produktong petrulyo, hayan makaapekto kini sa desisyon nga ipagawas sa Land Transportation Franchising and Regulatory Board kabahin sa petition sa Basak Lapu-Lapu City Jeepney Operators and Drivers Association (Balacjoda).
Matod ni Eduardo Montealto Jr., director sa LTFRB 7, nga gumikan sa pag-us-os sa presyo sa krudo, mausab ang pagtan-aw sa board sa ilang rekomendasyon nga giduso nga nagtugot sa pagpaumento sa minimum nga pletihan sa jeep pasaheroan base sa petition sa Balacjoda.
“Kay mausab man ang inflation unya ang DOE (Department of Energy) mohatag og panibagong data regarding sa rollback. Depende sa tan-aw sa board sa factors nga coming in. So, naay posibilidad nga maghimo sila og further study,” pagpasabot ni Montealto dihang nahinabi sa Superbalita Cebu sa Huwebes, Nobiyembre 8.
Niadtong Martes, Nobiyembre 6, gipatuman sa mga kompaniya sa lana ang P1 ngadto sa P1.10 nga us-os sa presyo sa matag litro sa gasolina, P0.90 ngadto sa P1 sa diesel ug P0.65 sa kerosene.
Kini na ang ikaupat nga sunodsunod nga pagkunhod sa presyo sa mga produkto sa petrulyo.
Ang Balacjoda nangayo og provisional usbaw nga P2.50 sa minimum nga pletihan sa PUJ ug usa sa ilang mga rason ang sunodsunod nga pagsaka sa presyo sa mga produktong petrulyo sa wala pa masang-at ang ilang petition.
Gidungog na sa LTFRB 7 ang petition niadtong Oktubre 15 ug nakaduso na kini og petition ngadto sa ulohang buhatan.
Wa motug-an si Montealto kon pila ang ilang girekomendar nga umento sa pletihan sanglit mausab pa kini ig abot sa board sa ilang ulohang buhatan.
Samtang, karong adlawa, Nobiyembre 9, ala 1 sa hapon, dunggon sa LTFRB 7 ang petition sa pundok sa mga bus operator nga nangayo og P4 nga umento sa pletihan sa bus.
Ang public hearing mahitabo sa rehiyonal nga buhatan sa LTFRB 7 sa North Reclamation Area, siyudad sa Sugbo.
“Atong awhag sa commuters nga mo-attend sila para tanang side mapaminaw para naay maayong resulta kining request sa bus operators for fare increase sa bus,” dugang ni Montealto. SCG