DUHA ka mga lalaki ang nasikop human gireklamong nagpabuto og armas ug nasakpan sab nga naghupot og klase-klaseng mga armas didto sa Purok 7, Sityo Maputi, Barangay San Jose, sa usa ka lungsod sa Compostela Valley (Comval) province.

Mga dinakpan nailhan nga mao sila Gesmar Empinado, 33, ug si Edgar Cansancio, 30, ug pulos molupyo sa Purok 7.

Sumala sa report gikan sa Comval Province Police Provincial Office nga pasado alas 10:00 sa gabii niadtong Biyernes, nasikop sa mga miresponding sakop sa Compostela Municipal Police Station ang duha ka mga suspek human gireklamo sa gwardiya nga si Agrino Escribio.

Giingong nagpabuto sa ilang mga armas ang mga suspek didto sa may parcela house nga gipanagiyahan ni Gesmar Empinado sa nahisgutang lugar.

Dihang miresponde ang mga otoriodad naaktuhan gayod nila ang mga suspek samtang naghupot og armas.

Nasakmit gikan sa mga dinakpan ang usa ka kalibre .38 nga pistola, usa ka UZI caliber 9mm (made in Italy) nga dunay serial number 15132, ug usa magazine nga dunay 10 ka mga bala.

Mga dinakpan gipangdala dayon ngadto sa presinto sa kapulisan aron maimbestigahan.

Ang kasong illegal "possession of firearms in relation to Commission on Election gun ban" gihikay na sa kapulisan batok kanila. (Marvin Pineda)