ANG Armed Forces of the Philippines naglambigit kang Bayan Muna Representative Satur Ocampo ngadto sa labing ulahing kalihukan sa mga rebeldeng New People's Army (NPA) atol sa pagbisita sa kongresista didto sa Mati City, Davao Oriental niadtong Sabado.

Sa gipaguwang pamahayag, ang 10th Infantry Division nagsulti nga usa ka rebelde ang namatay dihang nahitabo ang pinusilay mga alas 7:00 sa buntag didto sa Barangay New Visayas, Lupon, Davao Oriental samtang mibisita si Ocampo sa maong lalawigan.

Si Captain Emmanuel Garcia, Public Affairs Office chief sa 10th Infantry Division, nagbutyag sa Superbalita nga miresponde ang mga sakop sa 28th Infantry Battalion sa impormasyon nga dunay mga armadong tawo sa maong barangay.

Sa pagresponde sa militar, ilang gikasugat ang mga rebelde nga miresulta sa pipila ka oras nga engkwentro.

Nahipus sa militar ang duha ka mga M16 armalite rifles, usa ka shotgun ug ang patay'ng lawas sa wala mailhing rebelde gidala sa lungsod aron ilhon ang iyang pagkatawo ug ipahiluna ang pagpalubong.

Si Major General Carlos Holganza, commander sa 10th Infantry Division, nagpasalamat sa pagpakabanan sa mga molupyo sa maong dapit ug nagpadayag sab sa iyang pahasubo sa kabanay sa namatay nga rebelde.

Gawas sa militar, natahap sab ang Anad partylist nga ang mga dunay kalambigitan ang mga rebelde sa pagbisita ni Ocampo.

"Nagtuo mi nga area security kadtong mga NPA nga gikatagbo sa mga sundalo. Gituohan sab nga sila tipik sa grupo sa NPA nga nakigkita kang Ocampo didto sa Lupon ug Mati. Gikataho man gud nga miduaw si Ocampo sa San Isidro ug Banaybanay sa wala pa kini mipatighulog sa Lupon aron makigkita sa wala mailhing tawo," suma ni Anad Party-list Mindanao spokesperson Art Tariman sa Superbalita pinaagi sa tawag sa telepono.

Ang pasangil sa Anad ug militar gisaway sa mga progresibong pundok sanglit walay kalabutan ang pagbisita ni Ocampo sa maong lalawigan sa nahitabong engkwentro niadtong Sabado.

"Walay basehan ang pasangil sa military. Nganong ila mang gilambigit si Representative Satur Ocampo? Ang gihimo sa militar ug sa ANAD partylist nagpasabot lamang nga sila desperado na kaayo," suma ni John Birondo, tigpamaba sa Bayan Muna, dihang gihinabi sa Superbalita sa telepono.

Gidugang ni Birondo nga ang mga propaganda sa militar batok sa mga progresibong partylist usa ka pamaagi aron hiloan ang huna-huna sa mga tawo nga misalig sa ilang mga adbokasya. (BOT/AD)