Albor: Kalbaryo sa mga Boniel

GUMIKAN kay gimandoan lamang gihimong state witness sila Riolito Boniel ug Randel Lupas ubos sa DOJ Witness Protection Program.

Si Riolito misaysay nga gitagaan siya og 10,000 pesos ni Boniel sa iyang pagtabang . Si Lupas nga kawani sa lungsod sa Bien Unido drayber lamang sa magtiayong Boniel.

Giasoy kadtong naglugitom ug walay palad nga kaadlawon sa Hunyo 7, 2017.

Walay puangod nga gikulata ni Bokal Rey Niño Boniel ang iyang asawa Bien Unido Mayor Gisela Boniel sulod sa ilang Camp Dive Resort gumikan sa nag-alintabo nga kasuko.

Una, wala manalipod si Gisela sa nahanawng salapi sa panudlanan sa dihang gisiksik sa COA sa mayor pa ang bokal. Ikaduha, love triangle kay si Gisela dunay gikarelasyon nga Amerikano hinungdan sa kasong annulment. Saksi ang higala ni Gisela nga si Angela Leyson ug anak. Si Leyson nakuyapan kay gihapak og armas. Uban sa anak gikarga og van nga gimaneho ni Lupas gihatod sa Tubigon gipasakay og fastcraft pauli sa Lapu-lapu.

Si Gisela nga nawad-an og panimuot giputos og puti nga habol gikarga sa pumpboat nga gitimon ni Riolito.

Sa dihang naglawig nakamatngon, nangayog pasaylo apan gitiwasan ug mimando ang bokal nga gaposon ug ihagbong sa dagat sa Caubian Island. Wala mapalgi ang patayng lawas bisan gilukop og sudlay ang kadagatan.

Kasong parricide gisang-at sa korte sa Lapu-lapu batok ni Boniel ug kasong murder batok sa iyang kakonsabo Wilfredo Hoylar, Wilson Hoylar, Restituto Magoncia Jr., Allan delos Reyes, Lubo Boniel ug Bryan Sayson.

Usab kasong kidnapping ug physical injuries batok ni Boniel, Wilfredo ug Magoncia nga gipasaka ni Leyson ug anak sa korte sa Bohol gani pre-trial karong Nob. 15, 2018.

Napriso si Boniel gikan sa Fuente Police Station-Cebu ngadto sa Talibon District Jail-Bohol ug gibalhin sa CPDRC. Drayber Edgar Tapere mitahan nga maoy misugat ni Boniel sa Punta Engaño sakay sa motorsiklo gihatod sa ilang panimalay sa Monterazas de Cebu- Guadalupe.

Gironda ang panimalay aron pangitaon ang armas nga na-expire ang lisensya sa Dis. 2015.

Obstruction of Justice ang gisang-at batok sa igsoon Jay Boniel ug Atty. Gerry Carillo nga mimando nga patagoon si Tapere aron dili mainbestigar. Hulyo 29, 2017 si Boniel mi-plead not guilty sa kasong gipasaka ni Leyson ug anak sa RTC-Bohol. RID Chief Jonathan Cabal ug unom ka opisyal sa Bien Unido Police nakalingkawas sa kasong arbitrary detention nga gisang-at nila ni Lubo ug Sayson.

DOJ mibasura sa kasong kriminal batok Boniel tungod lang sa jurisdictional issue ug pagsibog sa kasong murder batok nila ni Wilson ug Magoncia. (csa_1156@yahoo.com/09064648954)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph