NAHUNA-HUNA niya ang mga imahe sa iyang pangasaw-onon, 4 anyos nga anak nga lalake ug ang iyang pamilya dihang giduot ngadto sa iyang ulo ang sumbohan sa assault rifle ngadto sa iyang walang tampihak.
Nagtuo siyang patyon na siya sa mga pirata nga niatake sa ilang barko ug nibihag kaniya ug sa iyang kaubanang seaman.
Si Magdaleno Sangre, Jr., nagkurog ug naghilak nga naghuna-huna nga mongitngit ang maayo untang kaugmaon sa iyang pamilya sa kadagatan sa Nigeria, dihang siya gibihag uban sa pito ka mga tripolanteng Pinoy, sa mga pirata niadtong Septiyembre 22.
Labing una kadtong kasinatian sa 24-anyos nga taga Pondol, Balamban sa gikaintapang mga pirata nga mang-hijack og barkong mga cargo aron ipa-ransom.
Apan wa kini makapabugnaw kaniya sa pagbalik sa pagsakay og barko sa gawas.
“Mobalik gihapon ko, uy. Mopahuway lang sa ko,” siya niingon.
Ang iyang inahan nga si Barangay Pondol secretary Esterlita, nahadlok sa kaluwasan sa iyang anak ug nangindahay nga mangita lang og trabaho dinhi sa nasod.
“Sa hunahuna lang gyod nako, kon akoy magbuot, dili na nako siya pasakyon. Pero nag-expect gyod ko nga mosakay siya og balik batan-on pa man siya,” siya niingon.
Ang iyang uyab nga si Jelyn Teves, 26, nihangyo kaniya nga di na lang unta magpalayo kanila.
“Niana man siya daghan siyag plano para namo,” siya niingon.
Nagsugod pagtrabaho si Sangre sa international nga barko niadtong 2015. Ikaunom siya sa puto ka mga magsuon.
Duna siyay maguwang nga lalake nga seaman sab.
Hitabo
Matod ni Sangre nga klaro pa sa iyang panumdoman ang iyang kasinatian.
Siya niasoy nga mga alas 6 sa buntag sa Septiyembre 22, natimbakuwas siya sa pagkatulog dihang ang tingog sa kapitan sa MV Glarus milanog sa speakers, nipahibawo nga dunay walo ka armadong mga pirata nga nagsingabot sa barko.
Nahitabo kini mga 45 nautical miles kun 83 kilometros southwest sa Bonny island samtang nagpadung sila sa Port Harcourt gikan sa ulohang siyudad sa Lagos.
Siya naalarma ug daling nitago sa engine room.
Apan sila si Sangre ug iyang mga kaubang tripolante napugos sa paggawas dihang nihulga ang mga pirata nga patyon ang ilang kapitan.
Nakasaka ang mga pirata sa barko pinaagi sa paggamit og tag-as nga mga hagdanan ug niputol sa razor wire sa deck, matod sa pamahayag sa Glarus nga gipadala sa AFP.
Giguba sa mga pirata ang mga ekipo sa komunikasyon ug gibilin ang 12 sa 19 ka mga tripolante.
Matod ni Sangre nga wa siya makapugong sa paghilak samtang sakay sa gamay nga barko sa mga pirata.
Dihang mga tres metros na sila sa Garus, usa sa mga pirata nitawag kaniya kay overloaded sila.
“He told me, ‘You small boy, you know how to swim?’” matod ni Sangre.
Niambak siya sa dagat ug nilangoy balik sa Glarus dihang gitiunan siya sa pirata sa riple niini. Mga usa ka oras siyang gi-hostage.
Human siya mahibalik sa Glarus, nitawag siya sa iyang pinaagi sa satellite phone.
Matod ni Teves, usa ka maestra sa pampublikong tunghaan sa Balamban, nga kalma ra ang tingog ni Sangre nga niasoy sa iyang kasinatian.
“Dugay kaayo ni-sink in,” matod ni Teves, kinsa nipahibawo kang Estrelita kalabot sa nahitabo ni Sangre.
Niuli si Sangre sa Sugbo sa unang semana sa Oktubre. Ang iyang mga kauban gipamuhian niadtong Oktubre 28.