DAGHANG mga resulta sa bag-o lang natapos nga eleksiyon nga makapakugang. Nagtuo ta nga ang ubang mga inpluwensiyadong mga pulitiko nga naghupot sa gahum sulod sa pipila ka nga katuigan, dili na mapukan.
Mao lagi ning ang giingon nga kon anaa na ta sa gahum dili ta maghambugero kay kining tanan nga atong gihuptan temporaryo ug lumalabay lang.
Dinhi lang sa dakbayan sa Sugbo, natapos na ang pagdominar sa “kanhi laos nga pulitiko.” Mosamot nag ka-laos karon. Usa ka tawo nga arogante, mangginukdanon, madinumtanon. binggatibo ug diktador. Sa iyang pangagamhanan, mora na siyag hari ug giisip nga iyang ulipon ang tanang mga tawo. Dili maminaw og sugyot. Dili makamao mobati sa panginahanglan sa uban. Halos hukasan na sa gahum ang uban sama sa iyang mga kaatbang ug dili mga kaalyado nga mga kapitan.
Gipang-imbarguhan sa government-issued nga mga sakyanan. Gukdon ang mangahas nga mosukol kaniya. Siya ang magbuot sa tanan.
Ang South Road Properties (SRP) morag iyang gihimong personal nga properdad. Walay makabuot kon unsa ang iyang himoon.
Hinaot nga kining iyang kapildihan sa mga kamot ni Vice Mayor Edgardo Labella makahatag kaniya og leksiyon nga usbon ang iyang batasan og kina-iya. Makamao na siya karon og unsay buot ipasabot sa pagka-mapahi-ubsanon ug dili na mopakita sa iyang dili maayong taras. Kana bang batasan nga makamaong mobati ug mosimpatiya sa kahimtang sa uban. Dili kanang klase nga tawo nga taas ra ang iyang pagtan-aw sa iyang kaugalingon nga morag Ginoo.
Kining kaparutan nga iyang nahiaguman bunga o resulta ra usab kini sa iyang dili maayong batasan nga gipakita ngadto sa katawhan. Gusto niya nga ang tanang tawo moluhod ug mo-ampo sa iyang atubangan ug mangaliyupo ngadto kaniya. Pero karon unsa na? Mo-unong pa kaha ang mga tawo nga mi-abiba kaniya kaniadto? Kining nahitabo kaniya mao ni ang gitawag og karma. Kana bang “gaba” gikan sa mga tawo nga iyang gipanggukod ug gilutos. Mirisi. (bobbygnalzaro@gmail.com)