GIPASALIG sa usa ka opisyal sa pundok sa mga bus ug mini bus operators nga andam sila moduso og petition sa Land Transportation Franchising and Regulatory Board (LTFRB) alang sa pagpakunhod sa pletihan kon padayon nga mag-rollback ang presyo sa diesel hangtod sa P35 ang matag litro.
Ang Cebu Provincial Bus Operators Association (CPBOA) nangayo og P4 nga umento sa pletihan sa unang lima ka kilometros ug .30 sentabos sa mosunod nga kilometro base sa petition nga giduso sa LTFRB 7.
Matod ni Julie Flores, chairman sa Cebu Provincial Bus and Mini Bus Operators Transport Cooperative, kon makapasalig ang gobiyerno nga padayon mokunhod ang presyo sa mga produkto sa petrulyo diin moabot na lang sa P35 ang matag litro sa diesel, sila mismo ang moboluntaryo nga mopaminos sa pletihan sa bus ug mini bus.
“Kay mao na ang atong baseline. Kita, dili ta ganahan nga masakripisyo atong mga sumasakay, pero dili na man pud maagwanta sa operators ang kamahal sa krudo bisan og nag-rollback na,” pahayag ni Flores.
Sigon niya nga unang higayon sila nangayo og umento sa pletihan sukad niadtong 2008, panahon ni kanhi gobernador ug Kongresista Gwendolyn Garcia.
Sumala ni Richard Corominas, presidente sa Cebu Provincial Bus Operators Association (CPBOA), ang angay unta nga pletihan sa mga bus nga nagbiyahian sa Sugbo kay ibase sa pletihan sa national nga karon P11 human giaprobahan sa ulohang buhatan sa LTFRB niadtong Oktubre ning tuiga ang P1 nga umento sa pletihan.
Apan sa kasamtangan, P6 ang gikolekta nga pletihan sa mga bus sa unang lima ka kilometro ug P1.20 sa mosunod nga kilometro.
Si Flores niingon nga ang maong pletihan gibase niadto pang 2008 dihang kapin pa lang sa P20 ang matag litro sa krudo nga karon dul-an na sa P50 ang matag litro.
Si Corominas nidugang nga dili lang unta ang presyo sa krudo ang tan-awon sa LTFRB sa pag-aprobar sa petition kon dili apil usab ang kahimtang sa mga operator nga gibug-atan kay kinahanglan sila mopalit og bag-ong unit sa bus gumikan sa Public Utility Vehicle Modernization Program.
“Dili na ma-sustain sa mga operator ang mga gipangayo sa gobiyerno...Ang bus karon wa ingon nagkabarato kondili nagkamahal,” dugang padayag ni Corominas.
Sa PUV Modernization Program sa LTFRB, sigon ni Flores, kinahanglan nga dunay closed-circuit television (CCTV) camera, global positioning system (GPS) ug Wifi connection ug kinahanglan nga Euro 4 ang makina nga gamiton sa ilang mga bus ug mini bus.
Si Corominas niingon nga gimahalan ang mga operators kay tag P4 milyones ngadto sa P5 milyones ang balor sa matag bag-ong unit sa bus unya tulo lang ka adlaw sa matag semana o Sabado sa hapon, Dominggo ug Lunes sa buntag ang tingsakay.
Sa public hearing nga gihimo sa rehiyonal nga buhatan sa LTFRB 7 niadtong Biyernes, Nobiyembre 9, 2018, way bisan usa ka pasahero ang nisupak sa petition CPBOA.
Sumala ni Reynaldo Elnar, assistant regional director sa LTFRB 7, gihatagan nila og 15 ka adlaw ang bus operators pagduso og mga dokumento sama sa gikan sa National Economic and Development Authority (Neda) aron pagsuporta sa ilang petition.
Kon sila mapakyas pagduso sa maong mga dokumento, isang-at gihapon ang petition ngadto sa ilang ulohang buhatan alang sa pagpagawas og hukom kon maaprobahan ba kini o dili.