DEAR Tita Heart,
Maayong adlaw kanimo tita ug sa mga suki sa Superbalita. Naa koy problema tita ug mahitungod kini sa akong karelasyon nga gay. Nagkahinigugmaay kaayo mi tita apan lang kay akong parents grabe kon makasupak sa among relasyon. Asa daw nako gibutang akong utok sa pakigrelasyon sa sama nako nga lalaki. Gabasa basahan pako og bibliya.
Tita love gayud namo ang usag usa busa mangayo ko og tambag kay ako pod baya kay masinabtanon ug gapatoo gayud sa akoang parents.
Cedrick
***
Hello Cedrick,
Siguro naa gayud ka sa kalibog nga sitwasyon karon kay nabahin ka between sa imong parents ug sa imong hinigugma. Ang imo gayud sigurong buhaton ipasabot og maayo imong parents kon unsa ang papel sa mga gay sa atong komunidad aron dili moubos ilang pagtan-aw kanila. Nga ang atong mga igsuong transgender adunay kasing kasing nga masakitan kon biay biayon, labina ingon ana nga pagtagad sa imong mga ginikanan. Sila ang mas doble nga masakitan.
Matag usa kanato kinahanglan respetuhon bisan kinsa pa na siya kay matag usa kanato unique nga indibidwal. Walay makabout kanimo kon kinsa imong gipili nga higugmaon kay ikaw ang nagdala sa imong kaugalingon. Ang imong parents unta naa sila motambag ug mosuporta kon unsa imong kalipay. Kon love gayud nimo ang gay nimo nga uyab padayona inyong relasyon ug padayon gihapon sa pagpasabot sa imong parents kay sa kadugayan mga ginikanan gihapon sila nga bisan pa mosupak, pagpasuko suko andam modawat kon unsa ka ug kinsa gayud ang imong higugmaon.
Tita Heart