SA TINUOD lang gikalipay sa katawhang Pilipino nga namatikdan sa atong Presidente Rodrigo Duterte ang dili maayong serbisyo sa duha ka nag-unang dagko nga telecommunication companies sa atong nasud sa kahinay sa ilang internet connection, butang nga dugay rang gireklamo sa mga dagkong mga kompaniya, ug mismo sa mga buhatan sa atong gobyerno.
Tungod sa atong bag-ong moderno karon, ang mga transaksiyon mapribado man o sa gobyerno nga buhatan, dali ra kaayo ang imong katuyoan tungod sa dakong tabang sa moderno nga kumonikasyon.
Sa milabay'ng Nobyembre 7 gihimo ang bidding sa ikatulong telecommunication sa atong nasud, o 3rd telco, pero, daghan ang nakuratan, ngano? Tungod kay mao man hinuoy midaug ang usa ka kompaniya nga wala ma-ilhi.
Aminado kita nga dakong kompaniya sa China ang telecommunication nga nakig-partner sa usa ka negosyante sa Pilipinas nga taga Davao apan ang negosyo dili telecom, ug kamo kitang tanang taga Davao ug bisan asang dapit sa Mindanao ug Pilipinas nakabalo kita kung unsa lamang ang mga internet providers sa atong nasud.
Mismo ang kanhi bise presidente sa Mindanao sa Philippine Telegraph Telecommunication (PT&T) sa atong interbyu kaniya, gihatagan sila og prankisa niadtong tuig 1997, apan wala mag-operate.
Ang pangutana, nganong sila ang nakadaug sa bidding? Kabalo namo unsay ngan ani nga kompanya kay nabalita man sa nasyunal. Duna kahay palakasan mao nga gipaburan ang usa ka kompanya nga karon lang mitumaw nga aduna na’y bidding?
Dugang panguntanan, kinsa kaha ang brasuhan nga taga Davao nga maoy nag-impluwensiya sa bidding? Nangutana lang ta, kay imposible nga sulod sa 56 ka tuig nga nag-operate ang PT&T inosente pa sila sa mga pamaagi sa bidding nga diskwalipikado man hinuon sila?
Hinuon dili bag-o alang kanato nga si bisan kinsa nga maanaa sa gahum, aduna gyuy mga tawo nga hilabihan ang pagpaduol sa luwag, pero, dili lang unta ipahalata aron dili magsige og sinamok ang mga dilawan nga walay laing gibantayan kon dili ang sayop nga lakang sa ato karong kagamhanan.
Tungod kay bisag kinsay pangutan-on walay "MISLATEL" nga kompaniya sa bisan asa ka magtagaw dinhi sa Mindanao ug sa Pilipinas, pero suportado gayod nato ang atong mahal nga presidente pero kung dunay mga dagkong negosyante nga walay pakialam sa mundo nga kaw-itan ang tanang mga project nagsalig kay malakas, butang nga dili napud maayong paminawon kay makadaut na kini sa atong presidente.
Dili nato tugotan nga ang mga oposisyon makabaton og mga lig-ong ebedensiya aron nga batikuson ang atong presidente nga nagtrabaho alang sa kausaban sa atong nasud; walay kausaban kung pareho lang gihapon ang atong nakita sa milabay'ng administrasyon.