NAGPASALAMAT si kanhi Department of Interior and Local Government (DILG) Secretary Mar Roxas sa pag-endorso kaniya ni Presidente Rodrigo Duterte.
Giingon sa kanhi secretary nga usa ka dakong pagdayeg nga giila siya sa pangulo alang sa umaabot nga 2019 mid-term elections.
Dugang ni Roxas nga sa pagka-senador ang iyang daganan ug di ang pagka-presidente sama sa ilang pagharong niadto sa 2016 elections.
Ang pag-endorso sa pangulo kang Roxas naatol sa pagbisita niini sa Boracay sa milabay nga adlaw.
Kahinumdoman, taliwala sa 2016 elections dagko ug mga halang nga mga isyu ang gipanglabay ni Roxas batok sa mga Duterte, pero kining tanan, karon daw walay nahitabo.
Nagpasabot lamang kini nga si Pangulong Duterte, di gayod motanom og pagdumot, kay nagtuo siya nga ang tawo sa kalibutan mahanaw gayod.
Gani, ang iyang kaaway sa politika niadto sa Davao City, nga kumpare pa gayod niya nga si Prospero “Boy” Nograles, karon nagkabalikay naman ang ilang mga maayong buot.
Ang di lang gayod balikan sa maayong pagtagad sa pangulo mao ang iyang mga kalaban nga sa iyang tan-aw nagdaot sa kaugamaon sa kabataan.
Sama pananglit ni Senador Leila de Lima, nga giingong protektor sa ilegal nga droga sud sa prisohan ug si Senador Antonio Trillanes nga mipahid og mga bakak nga istorya nga makadaut sa imahe, -- sila ang giingong wa pa gayod balikig maayong buot sa presidente.
Sa laktud, ang pangulo di gayod motanom og pagdumot, ug angay lamang nga kapanaminan kini sa tanan.