SUPERBALITA CEBU

Batang babaye gikaluhaan sa talagsaong sakit

“PAPA, papa!”

Sangpit sa anak ni Jose Goles ngadto niya kon makakita kini sa amahan sa dihang nag-edad pa kini og usa ka tuig.

Apan karon, ang maong pulong wala na madungog sa 34 anyos nga amahan gikan sa anak nga si Candice Ashly Goles, nga karon 3 anyos na.

Ang bata na-diagnosed nga may Left Transverse Sinus Dural Arteriovenous Malformation diin ninghubag ang mga ugat sa utok sa bata.

Gumikan niini, di na kini makaestorya og tarong, nihiwi ug ninghubag ang walang nawong, ug napikot ang walang mata.

“Everytime makakita siya nako, ang iyang kamot na lang ang iyang iisa ug magpapatik ug mag-align kay dili na siya kalitok og tarong. Nayungit siya padung two to three years old siya,” sugilon ni Jose, usa ka production worker sa Mactan Export Processing Zone (MEPZ) 1.

Talagsaon ang maong klase sa balatian dinhi sa nasod ug lisod ang pagpatambal niini, base sa gisulti sa doktor ngadto nila, nga maoy nag-atiman sa ilang kamanghurang anak.

Kinahanglan siya ipaubos sa medical procedure nga Onyx Embolization alang sa inanay nga kaayohan sa bata.

Ang mga tambal ug kagamitan sa pagtambal ni Candice sa gawas sa nasod pa i-order sa usa ka pharmaceutical nga kompaniya.

Moabot sa P1.17 milyones ang kinahanglanon sa pamilyang Coles nga taga dakbayan sa Lapu-Lapu aron mapaubos ang anak sa maong klase sa pagpanambal.

Si Jose nituyo og adto sa buhatan sa SunStar Cebu niadtong Sabado, Nobiyembre 10, ug nagpatabang nga makakuha og donasyon sa pamasin nga dunay maluoy sa anak ug matabangan sila sa pagpatambal niini.

Ang bata hapit na magduha ka buwan karon sa Neurosciences Critical Care Unit (NCCU) 2 sa Vicente Sotto Memorial Medical Center (VSMMC) diin nagpulipuli og bantay ang magtiayong Goles.

Talandugon ang kahimtang sa bata. Gibangagan ang iyang liog aron dunay makasud nga hangin nga gipaagi sa tubo lahos ngadto sa iyang baga. Kini nga pamaagi gitawag og tracheostomy.

Gibangagan usab ang iyang tiyan ug gi-insert ang gastrostomy tube o G-tube aron agian sa gatas ug tambal sanglit maglisod kini og kaon og solid food.

Si Candice nagsud ug gawas na sa lainlaing mga tambalanan sukad siya gipakatawo sa iyang inahan nga si Marilyn Coles, 31, tulo ka tuig na ang nakalabay.

Asoy ni Jose nga human mahimugso ang anak gipahibawo sila sa ilang doktor nga dunay bukol sa wala nga bahin sa nawong niini nga sama og kadak-a sa bola sa golf.

Kini nga kondisyon gitawag og cystic hygroma kon pagtubo sa cyst nga sagad sa liog o ulo. Ang hinungdan niini mao ang sayop nga pag-develop sa lymph sacs ug lymph vessels sa bata atol sa pagmabdos sa inahan.

Sila nalipay nga nasundan og usa ka batang babaye ang asawa apan gikaluhaan kini og talagsaong sakit.

“Pag-develop pa lang anang bataa sa tagu-angkan sa akong asawa gikaluhaan nana siya og sakit,” pahayag ni Jose.

Pag-abot og usa ka tuig ni Candice gioperahan kini niadtong Agusto 29, 2016 sa VSMMC ug gikuha ang unod nga motimbang og dul-an usa ka kilo.

Human operahi, makalakaw, makaestorya ug makalingkod pa ang bata.

Apan dihang nagpadung na sa duha hangtod tulo ka tuig ang pangidaron, dili na makalakaw ug makalitok og tarong si Candice tungod kay nihubag ang mga ugat sa iyang utok.

Kinahanglan siya maoperahan sa labing madaling panahon kay delikado mobuto ang ugat sa iyang utok niini labi na taas usab ang iyang heart rate.

“Sa akong pagka-amahan, magpakauwaw ko og panghangyo sa mga tawo sa paglaum nga matabangan mi. Naghago ko aron dunay makita nga alibyo sa akong bata,” sumala ni Jose, kinsa nangindahay nga mabasahan o makit-an sa mga nakadaug sa kapin P1.1 bilyones nga jackpot prize sa Ultra Lotto 6/58 ang kahimtang sa anak. (B)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph