SI Dr. Jose Rizal, ang atong nasudnong bayani, maoy nidaog sa mock poll nga gipahigayon sa Commission on Eelections (Comelec) niadtong miaging Sabado.
Nalupigan ni Rizal si Heneral Emilio Aguinaldo, ang atong unang presidente.
Maayo na lang kay wa mo-protesta si Aguinaldo nga napildi siya kay gitikas ang mock elections.
Pero nagduda ang kampo ni Sen. Noynoy Aquino nga si Rizal maoy sekretong kandidato sa administrasyon.
***
Sa maong mock election, si Marcelo del Pilar maoy nidaog nga bise presidente. Nawani sila si Senador Mar Roxas ug Senador Loren Legarda.
Di pa uwahi nga pailisian nila ang ilang mga apelyido. Maghuwat lang ta kinsa nilang duha maoy unang moangkon nga kaliwat nila si Marcelo del Pilar.
***
Sumala sa usa ka uwahing survey sa Pulse Asia, nahimutang sa gitawag nga statistical tie sila Senador Manny Villar ug Senador Noynoy Aquino sa lumba sa pagkapresidente.
Si Villar nalambigit sa C-5 extension project samtang si Aquino nalambigit sab sa Luisita-Subic-Clark-Tarlac Expressway (SCTEx).
Morag nagpakita kining maong survey nga dunay kay purohan nga mapresidente kon nalambigit kag proyekto sa highway.
***
“Hindi ako magnanakaw,” niingon si Senador Noynoy Aquino sa iyang propaganda sa TV. Di siya mangawat sa kaban sa gobyerno. Kana lagi kon duna pa siyay makawat.
“Hindi ako nagnanakaw,” matod pa ni Senador Manny Villar sa iyang pagpanalipod sa iyang kaugalingon nga wa siya mangwarta sa C-5 project nga abli na karon sa mga motorista.
Wa siya makahunahuna sa pagkanta niadtong linya nga, “My life is an open highway.”
***
Gitugtan sa Comelec si Margot Osmeña, hamiling kapikas ni Cebu City Mayor Tommy Osmeña, nga modagan sa pagkakonsehal sa south district sa dakbayan sa Sugbo apan gidiskwalipikar si Ronald Cuenco, anak ni Kongresista Tony Cuenco.
Ang duha mga kanhi green card holders busa mga permanent residents sa Estados Unidos sa Amerika.
Matod sa Comelec, naprobahan ni Margot nga giabandonar niya ang iyang green card samtang si Cuenco igo pa lang ni-apply sa abandonment sa iyang green card.
***
Nagfund-raising si Mayor Tommy Osmeña alang kang SPO1 Adonis Dumpit, nga bag-o lang nitahan sa iyang kaugalingon.
Daghang mga pulis ang gikatahong niamot sa maong fund-raising kay sahi ra kon sila sab maoy mahimutang sa nahimutangan karon ni Dumpit.
Pero ang makapatingkag sa dunggan mao ang pamahayag ni Dumpit nga supak diay siya sa mga vigilantes.