CARWASH lang unta maoy ablihan nga negosyo ni Rhea Florentino sa City Times Square 2 sa dakbayan sa Mandaue.
Apan human nagsugod ang operasyon sa iyang iWash carwash niadtong Hunyo 12, nakakita og laing business opportunity si Florentino nga mo-abli og laing klase sa establisamento nga iyang iatbang sa carwash.
Dinhi natawo ang uDrink Café nga giablihan niadto lang Agosto 28.
“Originally, carwash ra gyud unta ang among i- build pero ang ubang mga costumers magpaabot man sa ilang mga cars nga malimpyohan. So among gi- build ang café aron mahimo ning waiting area ug kan-anan sa mga car owners nga nagpa-wash and nagpa-service namo,” matod ni Florentino sa pakighinabi sa Superbalita Cebu.
Matod niya sa dihang bag-o pang giablihan ang iyang iWash, nakabantay siya nga way duol nga lugar diin maka-chill ug makakaon og mga baratong pagkaon iyang mga costumer sa carwash.
Gawas niini, mas mahal ang iyang mga tapad nga pagkaunan ug ang uban, dugay sab mangabli.
Kini maoy rason nga barato ang presyo sa mga finger foods sa uDrink Café ug mga ilimnon sama sa mga kape, frappe, soda drinks ug shakes.
Ang best-seller sa uDrink nga French Toast anaa ra sa P100.
Sagad mga pagkaon ilabi na mga finger foods anaa sa P100 paubos. Ang fries bisan unsang flavor nga anaa sa P60, siopao P20, Hong Kong style waffle P100 ug uban pa.
Ang 20 oz nga frappe (strawberry, Hershey chocolate, mocha, nutela, café latte ug rocky road) anaa ra sa P120 samtang P100 ang 16 oz.
Tanang shake sa nagkadaiyang flavor ana ra sa P50 ug ang ilang brewed coffee anaa ra sa P70 lakip na ang ubang klase sa kape.
Samtang ang ilang nabantog nga soda drink nga imported pa gikan sa nasud sa Thailand anaa sa P70.
Sigun pa ni Florentino nga adunay collagen ug anti-aging ang ilang soda drink nga “pampagwapa” sa makatilaw ani.
Gitataw niya nga bisan di magpalimpyo sa sakyanan, abli gihapon ang iyang café alang sa tanan ilabi na niadtong mga batan-on nga hilig og mga “instragramable” spots.
Susama sa iWash carwash, ang uDrink Café abli matag adlaw gikan sa alas 11 sa buntag hangtod sa alas 10 sa gabie.