MAS dugay ug mas lapad na diay ang Sinulog Fair 2019. Lalim bay magsugod na sa Disyembre 1, 2018 ug ablihan ang laing dapit para maong kalingawan didto sa SRP.
Atong nasayran gikan kang Kons. Dave Tumulak nga ang mga dagkong mga konsiyerto ug mga party adto na ipahigayon sa SRP duol sa kanhi isla sa Kawit. Lahi kini sa perya nga kanhi naandan nga anha ipahigayon sa SRP sa buwan sa Disyembre hangtod sa Pebrero.
Kining Sinulog Fair sa SRP mao sab ang dapit diin mahimong mag-inom ang mga tiguls ug mga batan-on kay layo ra kaayo sa ruta sa prosesyon ug sa Sinulog Grand Parade.
Gidugay?
Daw gipasagdan karon sa nasudnong kagamhanan ang mga bakwit sa Syudad sa Naga tungod sa kawalay klaro nga desisyon ang DENR ug MGB nga pabalikon na sila.
Hangtod karon, liboan ka mga bakwit ang mahimo na untang mobalik sa ilang gipuy-an apan di mabuhat kay walay klarong go signal gikan sa DENR ug MGB.
Mura ra ba gyud og dili ang MGB maoy nakaingon sa trahedya tungod sa paghatag niini og clearance sa Apoland nga mag-quarry sa dapit diin nidahili ug niresulta sa kamatayon sa pipila ka dosena ka mga Naganhon.
Unsa man ni, Kalihim Cimato? Gituyo ni sa paglangay o di lang gyud makamao ang imong mga tawo?
Imelda
Nadiskaril karong bag-o ang tinguha sa mga Marcos nga mausab ang kasaysayaan ug mahimong labing maayo nga presidente sa Pilipinas ang diktador ug kawatan nga si Presidente Ferdinand Marcos.
Nakonbikto sa kasong pangurakot ang kanhi first lady nga si Kong. Imelda Marcos diha sa Sandiganbayan ug nag-isyo kini og mando nga ipadakop siya.
Giingon nga tungod sa katiguwangan ni Imelda ug sa mga legal nga lakang nilang mabuhat hangtod moabot sa Korte Suprema, di masilotan si Imelda.
Apan klaro nga sa pagkakaron, duna nay kasong nakonbikto si Imelda ug di na makaingon ang iyang mga anak sama kang Gov. Imee Marcos ug kanhi senador Bongbong Marcos nga gibasura ang mga kasong nasang-at batok sa ilang pamilya.
Bisan pag di mapriso si Imelda Marcos, di na siya, iyang mga anak, ug ilang mga loyalista nga makapangugat nga wa siya makonbikto sa korte.
VIP
Hala, dali diay kaayo nakaareglo ang Very Important Person kun VIP nga nagsakay niadtong nag-convoy nga mga SUV nga ni-counterflow ug nakabangga og nagmotorsiklo.
Klarong nakuyawan ang maong biktima dihang gi-interbyu ni Leo Lastimosa kagahapon sa buntag. Niangkon siya nga nidawat og P20 mil aron maareglo ang maong kaso.
Siya ang nabiktima ug siya ang nahadlok? Kinsa gyud kaha kining maong gamhanang VIP?
(@anol_cebu sa Twitter)