USA ka clinic alang sa giabusohan nga kababayen-an sa dakbayan sa Mandaue, diin makapahimulos sa libre nga patambal, psycho-social intervention ug legal services, ang gitinguha karon sa kagamhanan sa Dakbayan sa Mandaue nga mapatukod.
Tawgon kini nga one-stop crisis center alang sa abused nga mga babaye, mapa-bata o hamtong na.
Gitug-an Atty. Elaine Bathan, chief of staff ni Mandaue City Mayor Luigi Quisumbing, nga sa pagkakaron usa ka feasibility study ang gihimo alang sa pagpatukod sa maong clinic nga gastuhan sa local government unit (LGU).
Apan gilantawan nga masugdan kini sa pagpatukod sayo sunod tuig diha sud sa compound sa Mandaue City district hospital.
Libreng medikasyon, mga trained psychologist ug psychiatrist ang anaa aron maoy motabang alang sa counselling ug sa paghimo na sa medical history report.
Makig-alayon usab sila sa Mandaue City Police Office, sa mga abogado sa Integrated Bar of the Philippines (IBP-Cebu chapter) ug sa Public Attorneys Office alang na sa pag-assist sa mga biktima sa pagpasaka og kaso.
Motabang usab sa gobyerno ang Zonta Club Cebu II alang na sa himuon nga mga training ug seminar sa staff nga ibutang sa maong pasilidad, human usab nisud og Memorandum of Agreement (MOA) ang Mandaue City government sa Zonta Club Cebu II kinsa nakaatiman sa pagtabang sa pagproteher sa kababayen-an gikan sa bisan unsang klase sa pagpangabuso, sama sa human trafficking, pag-abusar sa bana ug uban pa.
Matod ni Marilou Cañizares, pangulo sa Zonta Club Cebu II, nga sila ang motabang alang sa pagpangita og mga expert ug mga donations aron makatabang diha sa gihimong mga trainings di lang alang sa clinic, apan bisan diha na sa kabarangayan.
Sayo ning tuiga, nisugod na sila sa gihimong mga seminar sa kabarangayan, sa mga violence against women (VAW) desk office.
“We have identified Mandaue, and we vowed to help to make Mandaue a Vaw-free City with the help of the government, that is why we are here. Early this year we had seminar and trainings of all the focal persons from all the 27 barangays,” matod ni Cañizares.
Lakip na usab sa hingusgan sa pagtabang niini ang kabataan.
Gani magkahiusa usab ang Mandaue City government ug Zonta Club Cebu alang na sa himuong 18 Days of Activism, mga nagkadaiyang kalihukan sugod karong Nobyembre 23 hangtud na sa Desyembre 10 nga mao usab ang Human Rights Day. FMD