GARBO sa dakbayan sa Lapu-Lapu, gikan na sa pang-international nga tourism facilities, infrastructure, sama sa mga hotel ug beach resort, mahalon nga mga pagkaon sa mga restaurant sa syudad, ngadto sa mga services sama sa scuba diving, tour sa syudad ug uban pa ang i-offer sa baratong presyo ngadto sa mga Oponganon ug mga lumolupyo sa silingang syudad ug mga lungsod ipasundayag atol sa tulo ka adlaw nga tourism expo.

Kasagarang maka-afford lang sa mga 5-star hotel ug mahalon nga mga restaurant ang mga langyaw nga turista o kadtong lokal nga mga adunahan hinungdan nga pinaagi ning tulo ka adlaw nga Lapu-Lapu City Tourism Expo, kahigayunan na kini sa yano nga mga Oponganon nga masulayan ug matilawan sa barato nga presyo ang gipanghambog nga produkto ug serbisyo sa mga commercial establishments sa syudad, nga maoy kasagarang balik-balikan sa mga turista.

Ikaduha na karong tuiga sa pagpahigayon sa tourism expo nga himuon karong Nobyembre 15 hangtud sa 17 sa Gaisano Fiesta Island Mall Convention Center sa dakbayan sa Lapu-Lapu.

Gitug-an ni Hembler Mendoza, tourism officer sa Dakbayan, nga kasagarang katunga sa original nga presyo o adunay daghang mga promo ang itanyag atol sa tourism expo nga salmutan sa 40 ka mga exhibitors, gikan sa mga hotel, beach, restaurants, merchandising products, souvenirs ug uban pa.

Sa mao usab nga paagi, makig-alayon sila sa mga tour operators nga mahimo nga usa sa mga destinasyon sa mga turista ang exhibit kay usa usab kini ka paagi sa pagpaila pa sa mga produkto sa syudad sa Lapu-Lapu, ilabi na sa mga langyaw.

Sa maong expo ipasundayag usab ang mga hinimo sa mga taga Lapu-Lapu nga world class fashion icon nga sila si Mel Maria ug Philip Tampos, diin suoton kini sa mga contestant sa Miss Lapu-Lapu sa himuong fashion show.

Isip pagpasundayag sa mga marine life, mangrove plantation ug bird sanctuary nga usa sa garbo sa syudad, adunay himuong wildlife fantasy make-up contest ug sumbanan alang sa himuong mtv making contest.

Anaa usab ang mga purong kahoy nga souvenir items sa syudad nga ginama sa Primeworx, diin ang tinguha niini ang pagtabang sa pag-preserba sa kakahuyan ug kalikupan ug aron pagmenus sa basura.

“One of the goals is to let the locals know nga naa ni nga mga produkto ug serbisyo sud sa atong dakbayan, pwede makaapil ang mga establishments nga gikan sa silingan nga lungsod or City, for them to showcase also their products, kay more tourists sab ang might be able to come and see most of what Lapu-lapu City and the rest of Cebu can offer,” pagpasabot ni Mendoza.