SUPERBALITA CEBU

Protesta sa pagpili og chancellor sa UP Cebu

GIDUNGANAN og protesta ang pag-interview sa selection committee sa duha ka nominado sa pagka chancellor sa University of the Philippines (UP) Cebu kagahapon, Nobiyembre 12.

Bitbit ang placards, nanawagan ang mga magtutudlo ug mga estudyante nga dili angayan nga lugwayan sa iyang termino si UP Cebu incumbent chancellor Atty. Liza Corro.

Ilang gikwestyon ang credentials, academic records ug kwalipikasyon ni Corro sa pagkatudlo sa maong pwesto ug gisaway ang pagdumala niini sa unibersidad nga gihulagway nga anti-students.

Nahitabo kini samtang gihinabi sa selection committee sila si Corro ug ang laing nominee nga si Dr. Rolando Tolentino, professor sa UP Diliman.

Matod ni UP Cebu Professor Phoebe Sanchez, nga kwestyonabli ang pag-angkon ni Corro sa position nga usa lang ka publication ang nahimo ug giingong kwestyonabli kini kay dunay conflict of interest.

Siya nibutyag nga ang nagtudlo ni Corro isip chancellor sa UP Cebu nga si University President Alfredo Pascual mao usab ang nilingkod nga chairman sa Editorial Board.

Sila nahibung kon nganong gihatagan og Assistant Professor 7 nga level si Corro nga usa lang ang nahimo nga publication ug tulo pa lang ka tuig nga nahimong dean samtang ang ubang mga magtutudlo, moabot una og 15 ka tuig hangtod 20 ka tuig sa dili pa makakab-ot sa maong level.

“Kami sa sulod sa unibersidad, kinahanglan sa among pagka magtutudlo mo go through mi og requirements nga stringent kaayo ayha pa mi mahimong tenured faculty. Dunay tulo ka hisgutanang research, extension and teaching kining tulo ka areas kinahanglan ma-express sa publication,” padayag ni Sanchez sa press conference.

Karong Disyembre 3 ning tuiga, mahuman ang iyang tulo ka tuig nga termino.

Ang mapilian nga nominee sa selection committee iduso ngadto sa Board of Regents nga mag-deliberate karong Nobiyembre 17 ug sa Nobiyembre 29 mahibaw-an kon kinsa ang mosunod nga chancellor sa UP Cebu.

Si Ligaya Rabago, coordinator sa Arts and Culture ug dul-an na sa 35 ka tuig nga nagtudlo sa UP Cebu, nireklamo nga pabayron usab sila og rental sa mga pasilidad sama sa Performing Arts Hall bisan kon giila ang ilang organization sud sa unibersidad.

Nahitabo kini niadtong 2016 dihang ang ilang theater group dunay pasundayag ug gipangayoan sila og P12,000 nga abang sa Performing Arts Hall sama sa bayad sa mga taga gawas sa tunghaan.

“Sakit kaayo sa buot bitaw nga my God we’re here in UP, asa naman ni ang atong cultural artistic endeavors sa mga estudyante,” padayag ni Rabago nga maoy nisugyot alang sa P10 milyones nga pagpaayom-ayom sa nahisgutang hall.

Siya nipasangil nga nagsige og patukod og mga center si Corro sud sa unibersidad apan, wa kini magpatukod og center alang sa promusyon sa arts and culture ug Filipino language.

Si Lorraine Ecarma, chairperson sa Nagkahiusang Kusog sa Estudyante sa UP Cebu, nisaway sa pagdumala ni Corro sa unibersidad nga giingong wala maglantaw sa kaayohan sa mga tinun-an, nipasulod og mga tinun-an sa criminology sud sa tunghaan ug way klarong baruganan sa pagsulod sa military sa UP Cebu nga usa ka kalapasan sa Enrile Sotto Accord.

Si Tolentino niingon nga kon siya ang mapili nga sunod nga chancellor konsultahon niya ang mga estudyante sa pagpanday og mga polisiya ug paghimo og budget alang sa ilang mga kalihokan.

Tinguha niya nga lugwayan ang oras sa serbisyo sa library aron makatuon og taas nga oras ang mga estudyante ug magpahimo og computer center diin makabuhat sa ilang mga project.

Tubag ni Corro

Si Corro nipasabot nga tungod kay bag-o lang siya nasud sa academe, minos ang iyang nahimo nga publications ug research, apan wa ni magpasabot nga dili siya angayan mahimong academic leader.

Siya nasud sa UP Cebu isip dean niadtong 2012 ug nahimong chancellor niadtong 2016.

Matod niya, isip usa ka maestra, nakakuha siya og excellent rating, on time siya makasumitir sa final grades sa mga estudyante bisan sa iyang hectic administrative work.

Ubos sa iyang administrasyon, dagko ug mahinungdanon nga research centers ang nahimo sa UP Cebu apil na niini ang pag-host og master ug PhD programs ug pag-host og flagship projects sa Department of Science and Technology (DOST) ug Department of Trade and Industry (DTI).

Si Corro nitataw nga ang non-academic organizations ug non-academic activities lang ang pabayron ug may entrance fees sa paggamit sa mga pasilidad sa mga tunghaan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph