TALIWALA sa kahunas sa dagat ug aksidente sa duha ka mga sakayan, wa kini makabalda sa pagpahigayon sa tinuig nga seaborne procession sa imahen sa Birhen sa Regla sa Dakbayan sa Lapu-Lapu sa Lunes sa buntag, Nobiyembre 12.
Nilanat og usa ka oras ug 45 minutos ang biyahe sa ferry vessel diin luwan ang replica sa patron sa dakbayan, kansang ika 283 nga kapistahan saulogon karong Nobiyembre 21.
Ang seaborne procession naa na sa ika 18 ka tuig sa pagpahigayon.
Gibutyag ni Sr. Superintendent Limuel Obon nga sa paglawig sa mga sakayan nga niabay sa prosesyon nga nanukad sa Pacific Cebu Resort (PCR), Barangay Suba-basbas ug sa dayong sa liko sa tumoy sa Punta Engaño nga natungod sa Tayud, Consolacion aron sa pagsubay na sa Mactan Channel, duha ka pumpboat ang gikataho nga nagsingkil ang ilang katig.
Way naangol sa hitabo samtang mga sakop sa Coast Guard ug ubang volunteer dali nga niresponde kay adunay mga pasahero ang duha ka mga sakayan.
Gibana-bana nga moabot sa 80 ka mga sakayan sa dagat ang nisalmot sa seaborne procession, lakip na niini ang Cebu Coast Guard, Philippine Red Cross ug volunteers gikan sa mga dive shop ug resort sa Lapu-Lapu.
Nakasinati og kalisdanan ang organizer kay nianang pagkagabii, di makadunggo ang Topline Express 2 Ferry ngadto sa pantalan sa PCR aron makapang-decorate kay hunas.
Gikihanglang hakuton pa ang mga tawo ug mga gamit sakay sa gamay nga pumpboat.
Naabtan og adlaw ang pagpangandam apan bisan pa man, mapasalamaton si Mayor Paz Radaza sa mga komitaba sa malampuson nga kalihokan.
Nasayran nga ika-10 na kahigayon nga niapil sa pag-alsa ang mayor sa karo nga manukad sa Muelle Osmeña paingon sud sa Nuestra Señora Virgen dela Regla National Shrine nga gisugat sa kapin 2,000 ka tawo.
Si Rev. Fr. Bernard Corpuz, kura sa simbahan sa Birhen sa Regla, nipahinumddum sa mga deboto nga hinumduman ang mga hiyas sa Mahal nga Birhen ilabi na sa paghigugma ug pagpa-ubos sa pag-alagad sa katawhan alang sa tiunay ug klaro nga pagsangyaw sa maayong balita ug pagtulon-an sa langitnong Amahan.
Samtang human sa sayong pagpahibawo sa Coast Guard nga adunay pagkabalda sa operasyon sa Metro Ferry nga nagbase sa Muelle Wharf, sagad sa mga pasahero ang milikay sa paggamit sa ferryboat aron di malangay sa ilang lakaw o tuyo sa mainland Cebu.