AYAW og katingala kon ang presyo sa krudo ug gasolina nikunhod na sa imong pagpatubil sugod karong buntag, Nobyembre 13.
Ang tanang kompaniya sa lana nga nagbase sa dakbayan ug lalawigan sa Sugbo nipatuman og pagpa-us-os sa presyo sa ilang produktong petrolyo human sa pila ka buwan nga pagsaka.
Sa nakalabay nga mga semana, ang mga oil company nipatuman og oil price rollbacks, apan kapin sa P1 o mas diyutay pa.
Si Jay Julian, public ug media relations executive sa PTT Philippines, nagkanayon nga kini maoy labing dako nga rollback sa krudo ug gasolina sa 2018.
Ang PTT nipakunhod sa ilang presyo og P2.30 para sa gasolina samtang P2 sa ilang krudo o diesel samtang ang Phoenix Philippines nikibhang og P2.50 sa ilang gasolina ug P2 sa ilang krudo.
Ang Caltex, Shell, Flying V, Sea Oil nipatuman og P2.30 nga us-os sa gasolina ug P2 sa ilang krudo ug laing P1.85 sa ilang kerosene matag litro.
Rason
Gitumbok nga hinungdan sa pagkunhod sa presyo mao ang pagbarato Dubai crude diin sa niaging semana, nikunhod og US$ 1.70 matag barrel.
Lakip sa nikunhod mao ang Mean of Platts Singapore (MOPS) nga maoy gibasehan sa presyo sa Pilipinas kansang presyo nitibugsok sa US$ 2.60 ug US$ 2.20 sa gasolina ug krudo.
Si Julie Flores, presidente sa Cebu Provincial Bus and Minibus Operators Transport Cooperative, nihangop sa big time rollback sa petroleum products sanglit dako kini og ikatabang sa ilang operasyon.
“Nalipay kaayo mi sa pag-us-os sa presyo sa petrolyo hilabi na nga nag-angat ang Pasko nagsilbi kining sayo nga pinaskuhan ug hinaot mi nga magpadayon ang pag-us-os sa presyo, labing maayo kon moabot gani og P30 matag litro,” padayag ni Flores.
Ang ilang petisyon nga himuon nga P10 ang minimum nga pletihan sa bus ug minibus di una nila tandugon sa LTFRB.
Kon moabot ang presyo sa krudo og P35 matag litro, hayan di na nila ipadayon ang pagpangao og usbaw.
Wa malipay
Way epekto sa mga drayber sa pasaheroang mga sakyanan alang sa usa ka opisyal sa Basak, Lapu-Lapu City Jeepney Operators and Drivers Association (Balacjoda) ang big time rollback sa presyo sa mga produkto sa petrulyo nga gipatuman sugod karong adlawa, Nobiyembre 13.
Bisan sa paglaslas sa presyo sa lana, matod ni Metudio Belarmino, consultant sa Balacjoda, nga padayon sila mangayo og P2.50 nga provisional fare increase sa minimum nga pletihan tungod kay dili lang ang presyo sa lana ang ilang gibasehan sa pagsang-at og petition sa Land Transportation Franchising and Regulatory Board (LTFRB).
“Dili man na hangtod sa hangtod nga mo-down ang presyo sa petrulyo kay mosaka ra gihapon na og balik unya dinagko pud, karon ra na,” pahayag ni Belarmino dihang nahinabi sa Superbalita Cebu.
Sigon niini nga bisan og nius-os ang presyo sa lana, taas gihapon ang presyo sa nag-unang mga palaliton, nisaka ang abangan sa mga sakyanan ug nimahal usab ang pisa.
Niadtong 2008 pa katapusang gipaumentohan sa LTFRB ang pletihan sa pasaheroang jeepney sa rehiyon.
Samtang, alang kang Greg Perez, presidente sa Piston Cebu, gamay lang ang P2 hangtod sa P2.50 nga laslas sa presyo sa mga produkto sa petrulyo sa pipila ka higayon nga pagsaka niini nga moabot ngadto sa kinatibuk-ang P15 karong tuiga sugod niadtong Enero.
“Klaro kaayo nga maniobra na sa oil companies tungod sa petition nga giduso sa transport group alang sa usbaw sa pletihan. Himuon ni nga balido nga rason sa LTFRB nga dili i-grant petition alang sa umento sa pletihan,” pahayag ni Perez.
Sumala ni LTFRB 7 Director Eduardo Montealto Jr. nga ang rollback usa ka contributory factor sa ilang giduso nga rekomendasyon sa ulohang buhatan nga pausbawan ang pletihan sa jeep pasaheroan dinhi sa Sugbo aron tun-an og maayo sa dili pa aprobahan.
Siya niklaro ang rekomendasyon alang lang sa provisional increase nga sama sa gihangyo sa Balacjoda.