LAYO pa ang 2019 mid-term election apan nagkainit na ang politika sa Pilipinas.
Atoa nang makita sila sa TV, tarps, mantalaan ug madungog sa radyo sa ilang nagkadaiyang programa nga puwede natong masulti nga indirektang pangampanya.
Init kaayo ang mga isyu nga nitumaw sama sa political dynasty, mga igsuon o paryente nga nagkontra sa susamang posisyon, ka-partido nga nag-away, mga kandidato nga nagsaba-saba lang, paagi sa pagtikas sa resulta sa botohan, politiko nga naaa sa narco-list sa pangulo, uban pa ug siyempre ang sitwasiyon sa politika sa Davao.
Atong nahibal-an nga upat ka Duterte ang nidagan sa nagkalain-laing posisyon sama sa pagka-mayor, bise-mayor, konsehal ug pagka-kongresista.
Sa wala pa ang petsa sa pag-file sa certificate of candidacy, ugong kaayo ang balita nga modagan si Mayor Inday Sara sa senado ilabi na nga kanunay moguwa ang iyang pangalan sa Top 10.
Nisamot pa ang hungihong sa iyang pagdagan sa hataas nga puwesto tungod sa pagtukod niya sa partidong Hugpong ng Pagbabago nga nagsapnay sa ubay-ubay nga politiko karon.
Apan mora'g gibuboan og bugnaw'ng tubig ang tanan niyang tigsuporta kay subli siyang modagan pagka-mayor sa Davao sa eleksiyon sa sunod tuig.
Hinunua, iyang ginganlan ang mga pangalan sa kandidato nga suportahan sa iyang partido.
Walay nagsulay nga moharong kaniya busa seguradong siya na usab ang atong mayor sa mosunod nga tulo ka tuig.
Niadtong Sabado nakadawat ako og text gikan sa usa ka higala nga may impormasyon sa dagan sa politika sa hitaas. Matud pa niya nga may dakong purohan nga modagan si Mayor Inday pagka-kongresista sa unang distrito diin nidagan ang iyang magulang nga si kanhi Bise Mayor Pulong Duterte.
Ang pangutana kung posible ba kini subay sa balaod ug mag-swap ba silang duha sa puwesto?
Dugang pa sa akong higala nga kung madayon kining iyang pagdagan, seguradong siya ang sunod nga Speaker of the House puli ni kanhi Presidente GM Arroyo.
Mahinumdoman nga namahayag si PGMA nga mopahulay na siya human sa iyang termino sa 2019 ug suod niya si Inday. Kung mahimo nang Speaker, dali na niyang moambak sa mas hataas nga puwesto hangtud ang pagka-presidente nga gihandom sa iyang amahan.
Sa akong kabahin, posibleng tinuod ug dili "fake news" kining gipadala sa akong higala. Bisan tuod nga dako ang purohan nga modaug siya pagka-senador sa bugnong lugaynon sa 2019, mas maayo tan-awon sa katawhan kung mosugod siya sa ubos hangtud nga makapundar siya'g kaugalingong nasudnong pangalan ug binuhatan nga lahi sa iyang amahan.
Apan kung tinuod kining maong senaryo, kinsa kaha ang modagan pagka-mayor sa Davao? Matinuod kaha ang balita nga ang iyang bana nga si Mans Carpio ang modagan?