DEAR Tita Heart,
Maayong adlaw kanimo tita ug ingon man sa mga suki sa Superbalita. Gapaminawan napod ko sa imoha sa FM tita. Ako si Jorabel, 22 taga Camaman-an, Cagayan de Oro. Magpatambag ko sa imoha tita kay akong uyab gibulagan ko kay dili na daw siya malipayon sa amoang relasyon. Niangkon siya nga naa siyay nagustohan nga lain. Unya tita, mao daw sugo sa iyang nagustohan nga magtapos sami sa siya sugton. Tita nisamot akong kasakit kay nahibaloan nako nga ako diay close friend iyang gipanguyaban. Sakit kaayo tita nga nagsige ko hilak. Unsa akong buhaton. Aminado ko naay mga butang nga dili nako mahatag sa iyaha nga dili ko ganahan nga i-mention pod. Unsa akong buhaton tita nga love man nako siya.
Jorabel
***
Hello Jorabel,
Salamat kaayo sa pagpadala sa imong problema ug nalipay ko nga nabati na diay ko nimo sa FM. Tinoud naa nako mabati sa Radyo Natin 106.3 FM matag alas 5:00 ngadto alas 6:00 sa hapon kada Lunes, Miyerkules ug Biyernes sa hapon. Balik sa imong problema, siguro imong uyab dili makahulat kon kanus-a nimo mahatag iyang gusto sa imoha ug iya ning nakita sa lain, busa nakigbulag na lang siya. Ang kawalay puangod lang niya kay sa kadaghang babae, imo pa soud nga higala ang giuyab. Samtang imong soud nga higala wala man lang gyod nagkonsidera sa imohang gibati. Ang imong buhaton gyod is bulagi, ayaw na siya pugngi kay siya maoy nibulag. Imong buhaton is mag-move on na lang gyod. Lingawa imong kaugalingon sa pagpaminaw sa trio tagapayo. Bitaw lingawa imong kaugalingon sa imong trabaho ug paglaag kuyog ang laing friends nimo. Pag-ampo kanunay nga sa sunod nga relasyon molampos na.
Tita Heart