'Nagjerjer' sulod sa sakyanan, naaksidente

GIINGONG wala nay purol ang babaye ug lalaki nga gi-rescue human naaksidente ang ilang sakyanan niadtong Nobyembre 11 sa Barangay Carmen, siyudad sa Cagayan de Oro.

Gituohan nga nagtagay sa lawasnon nga kalipay ang babaye ug lalaki (mga identipikasyon gitago), pulos taga siyudad, samtang nagdagan ang sakyanan.

Sa pakighinabi sa SunStar Superbalita kang Police Officer 2 Micho Algabre sa Police Station 4 sa Carmen, gibutyag niini nga walay nakabangga nga laing sakyanan ang maong drayber sa sakyanan ug wala usab kini maka-inom.

Giingong pag-abot niini sa maong dapit, anaa na sa sulod sa ambulansiya ang duruha apan igo lamang nga mopahiyom ang lalaki sa dihang gipangutana kung unsa ang ilang gihimo atol sa panghitabo.

“Lone accident lang, mao may speculation but dili man sila moingon pud unsa ilang gibuhat. Ang lalaki igo ra mo pahiyom, allegedly wala na pud daw suot sa ubos ang babaye,” pahayag ni Algabre.

Sa imbestigasiyon sa kapolisan, nasayran nga gimaneho sa lalaki ang usa ka pick-up subay sa Mastersons Ave. Ilaya, Carmen, apan sa dihang wala pa makaabot sa Macanhan flyover, nawad-an og kontrol ang drayber ug mibangga sa kongkreto nga steel traffic signage ug poste sa kuryente, hinungdan sa pagkayabo sa sakyanan.

Nakaangkon ang mga biktima og mga bun-og sa kalawasan, hinungdan nga dali usab kining gipatambalan.

Karong panahon, nag-viral ang maong hitabo dihang usa sa mga Facebook user ang nag-post niini ug nakuhaan ang lalaki nga wala nay sapot sa dihang mikagawas sa nitakilid nga sakyanan.